2026 წლის დასაწყისიდან უკრაინის თავდაცვის ძალებმა დრონებით 800 000-ზე მეტი რუსული სამიზნე გაანადგურეს.

ამის შესახებ უკრაინის თავდაცვის მინისტრმა, მიხაილო ფედოროვმა განაცხადა.

„უკრაინის თავდაცვის ძალები სისტემატურად ასუსტებენ მტრის სამხედრო პოტენციალს, ანადგურებენ ლოგისტიკურ ინფრასტრუქტურას და იერიშებს ახორციელებენ მოწინააღმდეგის ზურგში მდებარე კრიტიკულად მნიშვნელოვან ობიექტებზე. დღეს მტრის დანაკარგების 90%-ზე მეტს სწორედ დრონები უზრუნველყოფენ.

წლის დასაწყისიდან უპილოტო სისტემების დანაყოფებმა მოწინააღმდეგის 800 000-ზე მეტი დადასტურებული სამიზნე გაანადგურეს. მათ შორის იყო ცოცხალი ძალა, საჰაერო თავდაცვის საშუალებები, არტილერია,ზალპური ცეცხლის რეაქტიული სისტემები, უპილოტო საფრენი აპარატები, რობოტული სახმელეთო კომპლექსები, სატრანსპორტო საშუალებები, შტაბები, საწყობები და რადიოელექტრონული ბრძოლის  სისტემები“, - აღნიშნა ფედოროვმა.

მისი განცხადებით, ამ პერიოდში დაახლოებით 167 000 რუსი სამხედრო დაიღუპა ან მძიმედ დაიჭრა.

მისივე თქმით, მაისი უკრაინის თავდაცვის ძალებისთვის ყველაზე შედეგიანი თვე იყო.

„ერთი თვის განმავლობაში მათ გაანადგურეს 181 000-ზე მეტი სამიზნე და ლიკვიდაცია მოახდინეს ან მძიმედ დაჭრეს 31 530 ოკუპანტი", - განაცხადა ფედოროვმა.