იორდანიამ, ქუვეითმა, ბაჰრეინმა და ომანმა უკრაინას თავდაცვის სისტემებსა და სამხედრო გამოცდილების გაზიარებასთან დაკავშირებით თანამშრომლობა სთხოვეს.
ამის შესახებ უკრაინის პრეზიდენტმა ვოლოდიმირ ზელენსკიმ ვიდეომიმართვისას განაცხადა.
„უკვე არსებობს შეთანხმებები, ეს ისტორიული შეთანხმებებია: უკრაინა და საუდის არაბეთი, არაბთა გაერთიანებული საამიროები, კატარი. ასევე ვმუშაობთ იორდანიასთან და ქუვეითთან. რუსტემ უმეროვი ამჟამად რეგიონში იმყოფება და პოლიტიკურ დონეზე მოლაპარაკებებს აგრძელებს; მან დღეს მომაწოდა ინფორმაცია. ასევე უკვე არის დამატებითი მოთხოვნები ბაჰრეინისა და ომანისგან. და უკრაინისთვის ეს მხოლოდ პრესტიჟისა და ჩვენი ხალხის პატივისცემის საკითხი არ არის. ეს ძალიან კონკრეტული და პრაქტიკული საკითხია: ჩვენ ვახორციელებთ ჩვენი თავდაცვის სისტემის, ჩვენი ჯარისკაცების უნარებისა და იმ ცოდნის ექსპორტს, რომელიც ჩვენს სახელმწიფოს აქვს. და ჩვენ ამ სახელმწიფოებისგან - ჩვენი პარტნიორებისგან - ველით შესაბამის თანამშრომლობას უსაფრთხოების სფეროში,“ - განაცხადა ზელენსკიმ.
ზელენსკიმ დასძინა, რომ არსებობს შეთანხმებები საჰაერო თავდაცვის გაძლიერების შესაძლებლობის, თავდაცვის წარმოების ერთობლივი განვითარებისა და ენერგეტიკული თანამშრომლობის შესახებ.
