უკრაინის საგარეო საქმეთა მინისტრი ანდრიი სიბიჰა გამოეხმაურა საერთაშორისო ოლიმპიური კომიტეტის მიერ უკრაინელი სკელეტონ მრბოლელის და 2026 წლის XXV ზამთრის ოლიმპიურ თამაშებზე უკრაინის ეროვნული ნაკრების მედროშის ვლადისლავ ჰერასკევიჩის დისკვალიფიკაციას.
„საერთაშორისო ოლიმპიურმა კომიტეტმა აკრძალა არა უკრაინელი სპორტსმენი, არამედ საკუთარი რეპუტაცია. მომავალი თაობები ამას სირცხვილის მომენტად დაამახსოვრებენ. მას მხოლოდ ომის დროს დაღუპული სპორტსმენების ხსოვნის პატივისცემა სურდა. ამაში არაფერია ისეთი, რაც წესებს ან ეთიკას ეწინააღმდეგება“, - წერს სიბიჰა.
უკრაინის საგარეო საქმეთა მინისტრის თქმით, „საერთაშორისო ოლიმპიურმა კომიტეტმა დააშინა, უპატივცემულობა გამოუცხადა და ლექციაც კი წაუკითხა ჩვენს სპორტსმენებს და სხვა უკრაინელებს, თუ როგორ უნდა გაჩუმებულიყვნენ „მსოფლიოში არსებული 130 კონფლიქტიდან ერთ-ერთის“ შესახებ“.
მან ასევე ყურადღება გაამახვილა იმ ფაქტზე, რომ „საერთაშორისო ოლიმპიური კომიტეტი სისტემატურად ვერ ახერხებს საერთაშორისო სპორტისა და ოლიმპიური ქარტიის უდიდეს დამრღვევთან - რუსეთთან დაპირისპირებას. ქვეყანამ, რომელმაც ბოლო სამი ათწლეულის განმავლობაში სამჯერ დაიწყო ოლიმპიური ზავის დროს შეჭრა, განახორციელა ყველაზე მასშტაბური სახელმწიფო დოპინგის პროგრამა, მოკლა 650 უკრაინელი სპორტსმენი და მწვრთნელი და გაანადგურა 800 სპორტული ობიექტი უკრაინაში. სწორედ რუსები უნდა მოიხსნან და არა მსხვერპლთა პატივისცემა აიკრძალოს. არცერთი მათგანი არ არის „ნეიტრალური“.
„თუ ოლიმპიური წესდება გულისხმობს, რომ ოლიმპიურ თამაშებში ყველაზე მნიშვნელოვანია არა გამარჯვება, არამედ მონაწილეობა“, მაშინ საერთაშორისო ოლიმპიურმა კომიტეტმა სრულად უღალატა მას, როდესაც ვლადისლავ ჰერასკევიჩს მონაწილეობის მიღება აუკრძალა და უღალატა რუსეთის მიერ მოკლულ 650 უკრაინელ სპორტსმენსა და მწვრთნელს“, - დაწერა სიბიჰამ და აღნიშნა, რომ უკრაინა ამაყობს ვლადისლავით, „რომელმაც მას არ უღალატა. გმადლობ, შენი პრინციპებისა და გამბედაობისთვის“.
შეგახსენებთ, უკრაინელი სკელეტონ მრბოლელი ვლადისლავ ჰერასკევიჩი ზამთრის ოლიმპიური თამაშებიდან დისკვალიფიცირებულია რუსეთთან კონფლიქტში დაღუპული უკრაინელი სპორტსმენების გამოსახულებიანი ჩაფხუტის გამოყენების გამო.
