დიდი ბრიტანეთის პრემიერ-მინისტრმა კირ სტარმერმა ბოდიში მოიხადა აშშ-ში ელჩად პიტერ მენდელსონის დანიშვნის გამო, რომლის შესახებ ჯეფრი ეპშტეინის მასალების გასაჯაროების შემდეგ გაირკვა, რომ მეგობრობდა და ახლო კონტაქტში იყო სექსუალური ძალადობისთვის გასამართლებულ ფინანსისტთან.
„ბოდიში, რომ დავიჯერე მენდელსონის სიცრუე და დავნიშნე ის. ბოდიში, რომ ახლაც კი, იძულებული ხართ, უყუროთ, როგორ საჯაროვდება ეს ისტორია ხელახლა. მენდელსონის ქცევასთან დაკავშირებით სერიოზული ბრალდებები და მტკიცებულებებია. მათ შორის, ურთიერთობა ეპშტეინთან, სექსუალური ძალადობისთვის გასამართლებულთან. უკვე ცნობილია, რომ მენდელსონი იცნობდა ეპშტეინს, მაგრამ არც ერთმა ჩვენგანმა არ იცოდა ამ ურთიერთობის სიღრმე. რაც გაცხადდა და რაც მისი დანიშვნის დროს ცნობილი არ იყო, ამან სერიოზული კითხვები გააჩინა “, – აღნიშნა კირ სტარმერმა.
„ეპშტეინის მსხვერპლებმა გადაიტანეს ტრავმა, რომლის წარმოდგენაც მრავალი ჩვენგანისთვის შეუძლებელია და ახლა უწევთ ხელახლა განიცადონ ის. ხედავდნენ, რომ პასუხისმგებლობა ჭიანურდებოდა ან, ხშირ შემთხვევაში, საერთოდ უარს ეუბნებოდნენ ამაზე
მინდა მოგმართოთ: ბოდიშს გიხდით. ვწუხვარ იმისთვის, რაც თქვენ გაგიკეთეს. ვწუხვარ, რომ ხელისუფლებაში მყოფმა ამდენმა ადამიანმა გაგიცრუათ იმედი. ვწუხვარ, რომ მანდელსონის ტყუილებს დავუჯერეთ და ის დავნიშნეთ და ვწუხვარ, რომ ახლაც კი გიწევთ ამ ამბის საჯაროდ ყურება“, - განაცხადა სტარმერმა პრესკონფერენციაზე.
სტარმერმა მანდელსონი დიდი ბრიტანეთის ელჩად აშშ-ში გასული წლის თებერვალში დანიშნა, თუმცა სექტემბერში ეპშტეინთან კავშირის გამო თანამდებობიდან გაათავისუფლეს.
აშშ-ის იუსტიციის დეპარტამენტის მიერ ეპშტეინის ფაილების გამოქვეყნების შემდეგ, ბრიტანულმა მედიამ გაამხილა, რომ მანდელსონმა, 2009 წელს პრემიერ-მინისტრ გორდონ ბრაუნის მთავრობაში ბიზნეს მდივნის თანამდებობაზე მუშაობისას, ეპშტეინს დიდი ბრიტანეთის მთავრობის შიდა დოკუმენტი გადაუგზავნა.
ბრიტანეთის პოლიციამ დოკუმენტის გადაცემის გამო მანდელსონის წინააღმდეგ სისხლის სამართლის გამოძიება დაიწყო.
