უკრაინის პრეზიდენტი ვოლოდიმირ ზელენსკი აცხადებს, რომ რუსებმა უგულებელყვეს შეერთებული შტატების თხოვნა და დაარღვიეს ენერგეტიკული ცეცხლის შეწყვეტის შეთანხმება, როდესაც 3 თებერვლის ღამეს უკრაინაზე ძლიერი თავდასხმა განახორციელეს.
ზელენსკიმ ამის შესახებ კიევში ნატო-ს გენერალურ მდივან მარკ რუტესთან ერთად გამართულ პრესკონფერენციაზე ისაუბრა.
„რუსებმა კვლავ არაფრად ჩააგდეს შეერთებული შტატების ძალისხმევები. ენერგეტიკასა და კრიტიკულ ინფრასტრუქტურაზე დარტყმებისგან თავის შეკავებაზე იყო შეერთებული შტატების პრეზიდენტის თხოვნა, იცით ამის შესახებ. ჩვენი სამომლაპარაკებლო გუნდების შეხვედრის დროს, ამერიკის პრეზიდენტი ამბობდა, რომ საჭიროა კვირის განმავლობაში დარტყმებისგან თავის შეკავება. ეს ძალიან მნიშვნელოვანი გადაწყვეტილება იყო. ფაქტობრივად ეს პარასკევს ღამე დაიწყო და დღეს ღამე რუსებმა, ჩვენი თვალსაზრისით, პირობა დაარღვიეს.
რუსეთი ახლა ან მიიჩნევს, რომ კვირაში შვიდის ნაცვლად არასრული ოთხი დღეა, ან ისინი ნამდვილად ომზე დებენ ფსონს და უბრალოდ ელოდებიან ამ ზამთრის ყველაზე ცივ დღეებს, როდესაც უკრაინის დიდ ნაწილში ტემპერატურა -20° გრადუსზე მეტია.“
უკრაინის პრეზიდენტმა აღნიშნა, რომ რუსებმა 71 რაკეტა და 450 დრონი გაუშვეს, რაც იმას ნიშნავს, რომ მათ გაზარდეს რაკეტებისა და უპილოტო საფრენი აპარატების რაოდენობა, რათა ყველაზე კრიტიკულ მომენტში შეტევა განახორციელონ.
მან აღნიშნა, რომ ამ დაბომბვასთან დაკავშირებით ამერიკულ მხარესთან კონტაქტზე იქნება და იმედი გამოთქვა, რომ მისი პარტნიორები უკრაინაში მიმდინარე მოვლენებზე არ გაჩუმდებიან.
ზელენსკიმ აღნიშნა, რომ კიევს Patriot-ის სისტემებისთვის მეტი რაკეტა სჭირდება.
