უკრაინა დასავლელ პარტნიორებთან შეთანხმდა, რომ რუსეთის მიერ სამომავლო ცეცხლის შეწყვეტის შეთანხმების ნებისმიერი დარღვევა გამოიწვევს ევროპისა და აშშ-ს კოორდინირებულ სამხედრო რეაგირებას. ინფორმაციას Financial Times დისკუსიებთან დაკავშირებულ წყაროებზე დაყრდნობით ავრცელებს.
გამოცემის ცნობით, გეგმა დეკემბერსა და იანვარში რამდენჯერმე განიხილეს უკრაინელ, ევროპელ და ამერიკელ ოფიციალურ პირებს შორის და გულისხმობს მრავალდონიან რეაგირებას რუსეთის მიერ შეთანხმებული ზავის ნებისმიერ დარღვევაზე.
წინადადების თანახმად, რუსეთის მიერ ცეცხლის შეწყვეტის შეთანხმების ნებისმიერი დარღვევა გამოიწვევს რეაგირებას 24 საათის განმავლობაში, დაწყებული დიპლომატიური გაფრთხილებით და, საჭიროების შემთხვევაში, უკრაინის არმიის მიერ დარღვევის შესაჩერებლად ზომების მიღებით.
FT-ის თანახმად, თუ საომარი მოქმედებები ამის შემდეგაც გაგრძელდება, წინადადება გადავა მეორე ფაზაში, რაც გულისხმობს ინტერვენციას ე.წ. მსურველთა კოალიციის ძალების გამოყენებით - ევროკავშირის წევრი ქვეყნების, დიდ ბრიტანეთის, ნორვეგიის, ისლანდიის და თურქეთის.
ამასთან, გამოცემის წყაროების ცნობით, გაფართოებული თავდასხმის შემთხვევაში, დასავლეთის მიერ მხარდაჭერილი ძალის, მათ შორის აშშ-ის სამხედროების, კოორდინირებული რეაგირება დარღვევიდან 72 საათის შემდეგ განხორციელდება.
