უკრაინის პრეზიდენტი ვოლოდიმირ ზელენსკი დარწმუნებულია, რომ ღირსეული და ხანგრძლივი მშვიდობის მიღწევა შესაძლებელია. უკრაინა მზადაა, შესაბამისი ნაბიჯები გადადგას.
როგორც ზელენსკიმ აღნიშნა, სამმხრივი შეხვედრების ახალ რაუნდამდე დღევანდელ შეხვედრას მომლაპარაკებელი ჯგუფის თითქმის ყველა წევრი დაესწრო, კერძოდ: რუსტემ უმეროვი, კირილო ბუდანოვი, სერჰიი კისლიცა, ანდრიი გნატოვი და ოლექსანდრ ბევზი.
მოლაპარაკებებში ასევე მონაწილეობას მიიღებს დავით არახამია.
„მე გუნდთან შევთანხმდი განხილვის ჩარჩოსა და კონკრეტულ მიზნებზე“, - აღნიშნა პრეზიდენტმა.
მან დასძინა, რომ უკრაინის დელეგაცია ასევე გამართავს ორმხრივ შეხვედრებს ამერიკულ მხარესთან.
„უკრაინა მზადაა რეალური ნაბიჯები გადადგას. ჩვენ გვჯერა, რომ ღირსეული და მდგრადი მშვიდობის მიღწევა შესაძლებელია. ჩვენ გვჯერა, რომ შეერთებულ შტატებთან უსაფრთხოების გარანტიების შესახებ ორმხრივი დოკუმენტი მზად არის და მოუთმენლად ველით აღდგენისა და ეკონომიკური განვითარების დოკუმენტებზე შემდგომ არსებით მუშაობას“, - აღნიშნა ზელენსკიმ.
ამავდროულად, როგორც ზელენსკიმ აღნიშნა, უკრაინა ასევე მოელის, რომ ამერიკული მხარე გააგრძელებს გადამწყვეტი როლის შესრულებას დიალოგისთვის აუცილებელი პირობების უზრუნველყოფაში.
„გასულ პარასკევს ღამით ფაქტობრივად ამოქმედებული დეესკალაციის ზომები ხელს უწყობს ხალხის ნდობის ამაღლებას მოლაპარაკებების პროცესისა და პოტენციური შედეგის მიმართ. ომი უნდა დასრულდეს. მადლობა მსოფლიოში ყველას, ვინც გვეხმარება“, - თქვა ზელენსკიმ.
4-5 თებერვალს, აბუ დაბიში გაიმართება სამმხრივი მოლაპარაკებების შემდეგი რაუნდი უკრაინის, აშშ-ისა და რუსეთის მონაწილეობით. მოსალოდნელია, რომ აშშ-ის სახელით ამ მოლაპარაკებებში აშშ-ის პრეზიდენტის სპეციალური წარმომადგენელი სტივ უიტკოფი ჩაერთვება.
