ტეხასის შტატში გამართულ აშშ-ის კონგრესის წარმომადგენელთა პალატის რიგგარეშე არჩევნებში დემოკრატმა კრისტიან მენეფიმ გაიმარჯვა.
რიგგარეშე არჩევნების მეორე ტურში, რომელიც შაბათს გაიმართა, კონგრესის მე-18 ოლქში გამარჯვებისთვის იბრძოდნენ დემოკრატები, 37 წლის მენეფი, ჰარისის ოლქის ყოფილი პროკურორი და 44 წლის ამანდა ედვარდსი, ჰიუსტონის საქალაქო საბჭოს ყოფილი წევრი. მე-18 საკონრესო ოლქი მოიცავს ჰიუსტონის ცენტრალურ ნაწილს და მიმდებარე რგიონის დიდ ნაწილს.
როგორც Reuters-ი იტყობინება, არჩევნების ეს კონკრეტული შედეგები არ იძლევა წარმოდგენას, თუ რომელი პარტია მოიპოვებს გამარჯვებას ნოემბერში, კონგრესის შუალედურ არჩევნებში, რადგან ამ ოლქში დიდწილად დემოკრატები იმარჯვებენ. მაგალითისთვის, ამ ოლქში 2024 წლის საპრეზიდენტო არჩევნებში, დემოკრატმა კამალა ჰარისმა 69% მიიღო, ხოლო დონალდ ტრამპმა 29%.
თუმცა, შაბათს ასევე გაიმართა ტეხასის შტატის სენატორის სპეციალური არჩევნები მე-9 ოლქში, სადაც დემოკრატმა ტეილორ რემეტმა 17%-იანი უპირატესობით გაიმარჯვა. აღსანიშნავია, რომ ამ ოლქში 2024 წლის საპრეზიდენტო არჩევნებში დონალდ ტრამპმა გაიმარჯვა.
ამ ოლქში დემოკრატების გამარჯვება იმედისმომცემია დემოკრატიული პარტიისთვის, რომლებიც ნოემბრის შუალედურ არჩევნებში გამარჯვებისკენ ისწრაფვიან.
ამ დროისთვის, აშშ-ის წარმომადგენელთა პალატაში უმრავლესობას რესპუბლიკელები ფლობენ 218 მანდატით, დემოკრატების 213 მანდატის წინააღმდეგ. კრისტიან მენეფის გამარჯვება დემოკრატებს 214-ე მანდატს მოუტანს. წარმომადგენელთა პალატაში კიდევ 3 ვაკანტური ადგილი შეივსება ჯორჯიის, ნიუ ჯერსისა და კალიფორნიის შტატებში, მარტში, აპრილსა და აგვისტოში რიგგარეშე არჩევნების შედეგად.
ნოემბერში გაიმართება კონგრესის შუალედური არჩევნები, სადაც ხელახალი 2-წლიანი ვადით აირჩევენ წარმომადგენელთა პალატის 435-ე წევრს.
