ამერიკის შეერთებული შტატები ირანის მხრიდან შესაძლო საპასუხო დარტყმებისთვის ემზადება და შესაბამისად, ახლო აღმოსავლეთში დამატებით საჰაერო თავდაცვის სისტემებს განალაგებს. ამის შესახებ The Wall Street Journal ამერიკელ მაღალჩინოსნებზე დაყრდნობით იუწყება.
როგორც იუწყებიან დამრტყმელი ჯგუფი USS Abraham Lincoln-ის მეთაურობით და F-35 და F-15E ტიპის გამანადგურებლები პოტენციურ საბრძოლო ზონასთან უფრო ახლოს გადაჰყავთ.
„ტრამპს ჯერ არ გადაუწყვეტია, როგორ და საერთოდ გამოიყენებს თუ არა ძალას. თუმცა, ირანზე ამერიკული საჰაერო დარტყმები გარდაუვალი არ არის, რადგან პენტაგონი დამატებით საჰაერო თავდაცვის შესაძლებლობებს ათავსებს, რათა უკეთ დაიცვას ისრაელი, არაბი მოკავშირეები და აშშ-ის ჯარები ირანის საპასუხო დარტყმისა და პოტენციურად გახანგრძლივებული კონფლიქტის შემთხვევაში“, - აცხადებენ ოფიციალური პირები.
ამერიკელი მაღალჩინოსნების თქმით, აშშ-ის სამხედრო ძალებმა შესაძლოა ირანზე შეზღუდული საჰაერო დარტყმები განახორციელონ, თუ ტრამპი დღეს თავდასხმის ბრძანებას გასცემს.
თუმცა, ისინი ვარაუდობენ, რომ ასეთი ქმედებები, სავარაუდოდ, ირანის მხრიდან სარკისებურ რეაქციას გამოიწვევს, რაც შეერთებულ შტატებისგან საჰაერო თავდაცვის მძლავრი შესაძლებლობების არსებობას მოითხოვს.
ამგვარად, პენტაგონი საჰაერო თავდაცვაზეა კონცენტრირებული და იორდანიის, ქუვეითის, ბაჰრეინის, საუდის არაბეთისა და კატარის სამხედრო ბაზებზე დამატებით THAAD-ის ბატარეას და Patriot-ის სისტემებს განალაგებს.
რეგიონში ასევე უკვე არის აშშ-ის გამანადგურებლები, რომლებსაც აქვთ სარაკეტო თავდაცვის შესაძლებლობები, რომლებსაც შეუძლიათ ბალისტიკური რაკეტებისა და დრონების ჩაჭრა. გემების ნაწილი პატრულირებს ორმუზის სრუტის, არაბეთის ზღვის, წითელი ზღვისა და აღმოსავლეთ ხმელთაშუა ზღვის მახლობლად.
