ირანი, თეირანის 2.5 მილიონი მაცხოვრებლისთვის თავშესაფრებს ამზადებს.
თეირანის მაცხოვრებლებისთვის თავშესაფრებად 300-ზე მეტი მიწისქვეშა სივრცე, მათ შორის ავტოსადგომები და მეტროსადგურები იქნება გამოყენებული.
როგორც თეირანის კრიზისების მართვის ორგანიზაციის ხელმძღვანელმა ალი ნასირიმ მედიას განუცხადა, თავშესაფრები დაახლოებით 2.5 მილიონი ადამიანს დაიტევს.
მისი თქმით, თავშესაფრებად 82 მეტროსადგურია გამოყოფილი, რომლებიც უკვე აღიჭურვა და უახლოეს მომავალში მათ შესახებ ინფორმაციის შემცველი აბრები და დაფები დამონტაჟდება.
„საჭირო პროცედურების დასრულებისა და ნებართვების მიღების შემდეგ, შეიქმნება დაახლოებით 2.5 მილიონი ადამიანის ტევადობის თავშესაფრები“, - განაცხადა ოფიციალურმა პირმა.
შეგახსენებთ, 28 იანვარს აშშ-ის პრეზიდენტმა დონალდ ტრამპმა განაცხადა, რომ ირანისკენ უზარმაზარი არმადა მიემართება და ირანს მოუწოდა სწრაფად დაჯდეს მოლაპარაკებების მაგიდასთან და გააფორმებს სამართლიანი შეთანხმებას - ბირთვული იარაღის გარეშე.
„იმედია, ირანი სწრაფად დაჯდება მოლაპარაკებების მაგიდასთან და მოლაპარაკებას დაიწყებს სამართლიან და თანასწორ შეთანხმებაზე - ბირთვული იარაღის გარეშე - ისეთზე, რომელიც ყველა მხარისთვის კარგი იქნება. დრო იწურება, ეს ნამდვილად არსებითია! როგორც ერთხელ უკვე ვუთხარი ირანს, დადეთ შეთანხმება! მათ ეს არ გააკეთეს და იყო „ოპერაცია „შუაღამის ჩაქუჩი“, ირანის მასშტაბური განადგურება. შემდეგი თავდასხმა გაცილებით უარესი იქნება! არ დაუშვათ, რომ ეს ისევ მოხდეს“,- დაწერა ტრამპმა.
ირანის არმიის მთავარსარდალმა, გენერალმა ამირ ჰატამიმ განაცხადა, რომ აშშ-თან დაძაბულობის ზრდის ფონზე ირანის შეიარაღებული ძალები მზად არიან, ქვეყანა ბოლომდე დაიცვან.
„ირანის ისლამური რესპუბლიკის შეიარაღებული ძალები სავსეა მეთაურებით, გენერლებით, ოფიცრებითა და ჯარისკაცებით, რომლებიც ამ ქვეყანას ბოლო მომენტამდე დაიცავენ“, - აღნიშნა ამირ ჰატამმა.
