სირცხვილი მინესოტის ხელმძღვანელობას და ქუჩაში გამოსულ გიჟებს, - ამის შესახებ აშშ-ის ომის მდივანი პიტ ჰეგსეთი X-ზე წერს.
ჰეგსეთი მინესოტაში მომხდარ მკვლელობას ეხმაურება და საიმიგრაციო და საბაჟო სამსახურს (ICE) მხარდაჭერას უცხადებს.
„მადლობა ღმერთს ICE-ს პატრიოტებისთვის – ჩვენ 100%-ით გიჭერთ მხარს. თქვენ ქვეყანას იხსნით. სირცხვილი მინესოტის ხელმძღვანელობას და ქუჩაში გამოსულ გიჟებს. ICE > MN (მინესოტა)“, – დაწერა ჰეგსეთმა სოციალურ ქსელში.
ამასთან, ჰეგსეთი აზიარებს პოსტს, სადაც განმარტებულია, თუ როგორ უნდა „აირიდო თავიდან“ საიმიგრაციო და საბაჟო სამსახურის აგენტები.
„როგორ უნდა „აირიდო თავიდან“ საიმიგრაციო და საბაჟო სამსახურის აგენტები: 1. არ იყოთ აქ (აშშ-ში) არალეგალურად; 2. არ დაესხათ თავს ICE-ს აგენტებს; 3. დაემორჩილეთ ფედერალურ და სახელმწიფო კანონებს“, – წერის პოსტში აშშ-ის ომის მდივანი.
ცნობისთვის, 24 იანვარს მინესოტის ქალაქ მინეაპოლისში ფედერალურმა აგენტებმა კიდევ ერთი ადამიანი მოკლეს. აშშ-ის შიდა უსაფრთხოების დეპარტამენტის ცნობით, სასაზღვრო სამსახურის აგენტებმა კაცს, რომელიც მათ ცეცხლსასროლი იარაღით უახლოვდებოდა, თავდაცვის მიზნით გაუხსნეს ცეცხლი. მინეაპოლისის პოლიციის მეთაურის, ბრაიან ო’ჰარას თქმით, მოკლული 37 წლის კაცი აშშ-ის მოქალაქე იყო. მას იარაღი კანონიერად ჰქონდა.
მინეაპოლისის მერმა, ჯეიკობ ფრეიმ, დონალდ ტრამპის ადმინისტრაციის მიერ შტატში იმიგრაციის კონტროლის ოპერაციების დაუყოვნებლივ დასრულებისკენ მოუწოდა.
„კიდევ რამდენი მცხოვრები, კიდევ რამდენი ამერიკელი უნდა დაიღუპოს ან მძიმედ დაშავდეს, სანამ ეს ოპერაცია შეწყდება?“ - განაცხადა ფრეიმ პრესკონფერენციაზე.
შტატის გუბერნატორმა და ორმა სენატორმა ასევე მოუწოდეს ფედერალურ აგენტებს, დატოვონ შტატი.
დონალდ ტრამპმა მინესოტის შტატის გუბერნატორი და მინეაპოლისის მერ „აჯანყების წაქეზებასა“ და ფედერალური აგენტების მუშაობისთვის ხელის შეშლაში დაადანაშაულა.
