აშშ-ის პრეზიდენტმა დონალდ ტრამპმა განაცხადა, რომ ამერიკელმა სამხედროებმა შესაძლოა ნარკოკარტელების სამიზნეების წინააღმდეგ სახმელეთო დარტყმები განახორციელონ დედამიწის ნებისმიერ წერტილში, მათ შორის მექსიკაში, ცენტრალურ და სამხრეთ ამერიკაში. ამის შესახებ ტრამპმა გამოცემა New York Post-თან ინტერვიუში განაცხადა.
„ჩვენ კარტელებს დავარტყამთ. ჩვენ ვიცით მათი მარშრუტები. ჩვენ ყველაფერი ვიცით მათ შესახებ. ჩვენ ვიცით, სად ცხოვრობენ ისინი. ჩვენ ყველაფერი ვიცით მათ შესახებ,“ - განაცხადა ტრამპმა.
ჟურნალისტის შეკითხვაზე, შეიძლება თუ არა ამ დარტყმების განხორციელება „სადმე“, კერძოდ, მექსიკაში, ვენესუელაში ან კოლუმბიაში, ამერიკის პრეზიდენტმა უპასუხა: „ნებისმიერ ადგილას“.
ტრამპმა ასევე ხაზი გაუსვა „წყალზე მიღწეულ წარმატებებს“ და განაცხადა, რომ გემებზე სამხედრო დარტყმების შედეგად ზღვით გადაზიდული ნარკოტიკების 97 პროცენტი ამოღებულია.
მან აღნიშნა, რომ ახლა იგივე წარმატების ნახვა „ხმელეთზე“ სურს.
აშშ-ის იუსტიციის დეპარტამენტის მონაცემებით, შეერთებულ შტატებში არსებული უცხოეთში წარმოებული უკანონო ნარკოტიკების უმეტესობა ქვეყანაში კონტრაბანდული გზით შედის მექსიკასთან და, უფრო მცირე რაოდენობით, კანადასთან საზღვრის გავლით.
ტრამპის ადმინისტრაცია ამჟამად ზეწოლას ახდენს მექსიკის მთავრობაზე, რათა მან ქვეყანაში ამერიკელი ჯარისკაცების შეყვანის უფლება მისცეს, სავარაუდოდ, ნარკოტიკებით ვაჭრობის წინააღმდეგ საბრძოლველად.
იანვრის დასაწყისში მექსიკის პრეზიდენტმა კლაუდია შეინბაუმმა უარყო ვარაუდები, რომ ტრამპმა შესაძლოა სამხედრო დარტყმები განახორციელოს მის ქვეყანაში კარტელების წინააღმდეგ.
„მე არ მჯერა შემოჭრის. არც კი მგონია, რომ ისინი ამას ძალიან სერიოზულად აღიქვამენ. მან [ტრამპმა] რამდენჯერმე მოითხოვა, რომ ამერიკულ არმიას მექსიკაში შესვლის უფლება მიეცეს.
ჩვენ ძალიან მტკიცე უარი ვთქვით, პირველ რიგში, იმიტომ, რომ ჩვენ ვიცავთ ჩვენს სუვერენიტეტს და მეორეც, იმიტომ, რომ ამის საჭიროება არ არსებობს,“ - განაცხადა მექსიკის პრეზიდენტმა.
