უკრაინის პრეზიდენტმა ვოლოდიმირ ზელენსკიმ აბუ დაბიში უკრაინას, აშშ-სა და რუსეთს შორის გამართული მოლაპარაკებები კონსტრუქციულად შეაფასა და განაცხადა, რომ მოლაპარაკებები, შესაძლოა, მომავალ კვირას გაგრძელდეს.
პრეზიდენტმა განაცხადა, რომ მან უკრაინის დელეგაციისგან ანგარიში მიიღო აბუ დაბიში უკრაინას, აშშ-სა და რუსეთს შორის გამართული მოლაპარაკებების შემდეგ.
ზელენსკიმ აღნიშნა, რომ ეს საკმაოდ დიდი ხნის შემდეგ პირველი ასეთი ფორმატია - ორდღიანი სამმხრივი შეხვედრები: „ჩვენ ბევრი რამის განხილვა მოვახერხეთ და მნიშვნელოვანია, რომ საუბრები კონსტრუქციული იყო“.
მისი თქმით, დისკუსიების მთავარი აქცენტი ომის დასრულების შესაძლო პარამეტრებზე იყო.
„მე ნამდვილად ვაფასებ იმას, რომ არსებობს გაცნობიერება ომის დასრულებისა და რეალური უსაფრთხოების შენარჩუნების პროცესზე ამერიკული მონიტორინგისა და კონტროლის აუცილებლობის შესახებ.. ამერიკულმა მხარემ წამოჭრა შესაძლო ფორმატების ომის დასრულების პარამეტრების დამტკიცების საკითხი და ამისთვის აუცილებელი უსაფრთხოების გარემოებების საკითხი“, - წერს ზელენსკი.
ზელენსკიმ აღნიშნა, რომ ბოლო შეხვედრების შემდეგ ყველა მხარე შეთანხმდა, რომ მოლაპარაკებების თითოეული ასპექტის შესახებ თავიანთ დედაქალაქებს წარუდგენენ ანგარიშს და შემდგომ ნაბიჯებს ლიდერებთან შეათანხმებენ.
„სამხედროებმა შეადგინეს კითხვების სია შესაძლო შემდეგი შეხვედრისთვის. იმ პირობით, რომ წინსვლის სურვილი იქნება, უკრაინა კი მზად იქნება. შედგება შემდეგი შეხვედრები, შესაძლოა, მომავალ კვირაში. მოუთმენლად ველი დელეგაციის პირად ანგარიშს დაბრუნების შემდეგ,“ - განაცხადა ზელენსკიმ.
პრეზიდენტმა განაცხადა, რომ მოლაპარაკებები მიმდინარეობდა სამი მხარის სამხედროების მონაწილეობით.
უკრაინული მხრიდან იყვნენ რუსტემ უმეროვი, კირილო ბუდანოვი, ანდრიი გნატოვი, დავით არახამია, სერჰიი კისლიცა, ვადიმ სკიბიცკი. ამერიკულ მხარეს წარმოადგენდნენ სტივ უიტკოფი, ჯარედ კუშნერი, დენ დრისკოლი, ალექს გრინკევიჩი და ჯოშ გრუნბაუმი. რუსეთის მხრიდან იმყოფებოდნენ სამხედრო დაზვერვისა და არმიის წარმომადგენლები.
