ვენესუელამ აშშ-ის მიერ ვენესუელური ნედლი ნავთობის გაყიდვიდან პირველი შემოსავალი მიიღო, მას შემდეგ, რაც იანვრის დასაწყისში შეერთებულმა შტატებმა პრეზიდენტი ნიკოლას მადურო დააკავა.
აშშ-მა გასულ კვირას განაცხადა, რომ დაასრულა ვენესუელური ნავთობის გაყიდვა 500 მილიონ დოლარად. ინფორმაცია დაადასტურა ვენესუელის დროებითმა პრეზიდენტმა დელსი როდრიგესმაც.
"გაცნობებთ, რომ ნავთობის გაყიდვიდან მივიღეთ თანხები, კერძოდ, პირველი 500 მილიონი დოლარიდან 300 მილიონი დოლარი", - განაცხადა როდრიგესმა კარაკასში გამართულ პრესკონფერენციაზე.
როდრიგესის მტკიცებით, კარაკასი ნავთობის გაყიდვიდან მიღებულ დოლარს ვენესუელური ვალუტის, ბოლივარის მხარდასაჭერად გამოიყენებს.
მისი თქმით, ეს თანხები სავალუტო ბაზრის "სტაბილიზაციისთვის" იქნება გამოყენებული, "ჩვენი მუშაკების შემოსავლისა და მსყიდველობითი უნარის დასაცავად".
