უკრაინის პრეზიდენტმა ვოლოდიმირ ზელენსკიმ განაცხადა, რომ 18 იანვრის ღამეს რუსებმა ექვს რეგიონზე 201 დრონით თავდასხმა განახორციელეს. ამის შესახებ ზელენსკი Facebook-ზე წერს.
კერძოდ, დარტყმის ქვეშ მოექცნენ სუმის, ხარკოვის, დნიპროს, ზაპორიჟიეს, ხმელნიცკისა და ოდესის ოლქები.
უკრაინის პრეზიდენტმა აღნიშნა, რომ ათობით ადამიანი, მათ შორის არასრულწლოვანი დაშავდა, ხოლო ორი ადამიანი დაიღუპა.
ზელენსკის ცნობით, შვიდი დღის განმავლობაში რუსებმა 1300 დრონი, დაახლოებით 1050 მართვადი ავიაბომბი და სხვადასხვა ტიპის 29 რაკეტა გაუშვეს.
„სწორედ ამიტომ სჭირდება უკრაინას მეტი დაცვა, პირველ რიგში, მეტი რაკეტა მისი საჰაერო თავდაცვის სისტემებისთვის. თუკი რუსეთი განზრახ აჭიანურებს დიპლომატიურ პროცესს, მაშინ მსოფლიოს პასუხი გადამწყვეტი უნდა იყოს: მეტი დახმარება უკრაინისთვის და მეტი ზეწოლა აგრესორზე,“ - წერს ზელენსკი.
