მედიის ცნობით, ტანზანიაში ოთხშაბათს, 29 ოქტომბერს გამართული საპრეზიდენტო და საპარლამენტო არჩევნების შემდეგ სამდღიანი საპროტესტო აქციების დროს, უსაფრთხოების ძალებთან შეტაკებისას დაახლოებით 700 ადამიანი დაიღუპა.
დემონსტრაციებში ძირითადად ახალგაზრდები მონაწილეობენ, რომლებიც ტანზანიის ქალაქების ქუჩებში არასამართლიანი არჩევნების გასაპროტესტებლად გამოდიან.
მომიტინგეები მთავრობას დემოკრატიისთვის ძირის გამოთხრაში ადანაშაულებენ. იდევნებიან ოპოზიციის ლიდერები - ერთი ციხეშია, მეორეს კი ტექნიკური მიზეზების გამო არჩევნებში მონაწილეობა აეკრძალა - რამაც გაზარდა მოქმედი პრეზიდენტის, სამია სულუჰუ ჰასანის გამარჯვების შანსები.
ევროკავშირმა უკიდურესი შეშფოთება გამოთქვა ტანზანიაში საპრეზიდენტო და საპარლამენტო არჩევნების შემდეგ შიდა პოლიტიკური ვითარების მკვეთრი გაუარესებისა და მომიტინგეების დაღუპვის შესახებ გავრცელებული ინფორმაციის გამო.
„ევროკავშირი მოუწოდებს ხელისუფლებას, გამოიჩინოს მაქსიმალური თავშეკავება ადამიანის სიცოცხლის შესანარჩუნებლად“, - განაცხადა ევროკავშირის უმაღლესმა წარმომადგენელმა საგარეო საქმეთა და უსაფრთხოების პოლიტიკის საკითხებში კაია კალასმა.
მან მიუთითა არჩევნებში მონაწილე სხვადასხვა პოლიტიკური ძალისთვის თანაბარი პირობების არარსებობაზე, ასევე გატაცებების, გაუჩინარების და ხელისუფლების ოპონენტების წინააღმდეგ ძალადობის შესახებ ცნობებზე.
„ევროკავშირი მოუწოდებს ყველა დაკავებული პოლიტიკოსის გათავისუფლებისკენ და დაკავებულთა გამჭვირვალე და სამართლიანი სასამართლო პროცესის ჩატარებისკენ მყარი სამართლებრივი საფუძვლით, ასევე გატაცებების, გაუჩინარებებისა და ძალადობის ყველა შემთხვევის სწრაფი და საფუძვლიანი გამოძიებისკენ“, - განაცხადა კალასმა.
არჩევნების შემდეგ ტანზანიის სახელმწიფო ტელევიზიამ გამოაცხადა საბოლოო შედეგები, რომლის მიხედვითაც პრეზიდენტმა სამია სულუჰუ ჰასანმა მიიღო ხმების 97.66%, გაიმარჯვა ყველა ოლქში და ხელახლა გახდა სახელმწიფოს პირველი პირი.
უდიდესმა ოპოზიციურმა პარტიამ, „ჩადემამ“, რომელსაც არჩევნებში მონაწილეობა აკრძალული აქვს და მოქალაქეებს კენჭისყრის ბოიკოტირებისკენ მოუწოდა, განაცხადა, რომ ოფიციალურ შედეგებს არ ცნობს.
პარტია ჩადემას“ წარმომადგენელმა, ჯონ კიტოკამ, არჩევნების შედეგებს „დემოკრატიული პროცესის დაცინვა“ უწოდა და ახალი არჩევნების დანიშვნა მოითხოვა. ოპოზიციამ ასევე განაცხადა, რომ არჩევნების შემდეგ დაწყებულ საპროტესტო აქციებში სულ მცირე 800 ადამიანი დაიღუპა.
AFP-ს წყაროებმა დაადასტურეს, რომ დაღუპულია ასობით ადამიანი და მსხვერპლთა რაოდენობა, შესაძლოა, მთელი ქვეყნის მასშტაბით „დაახლოებით 700-800“ იყოს.
არჩევნებამდეც კი, ადამიანის უფლებათა დამცველმა ორგანიზაციებმა პრეზიდენტი სულუჰუ ჰასანი ტერორში დაადანაშაულეს და ყურადღება მრავალრიცხოვან გატაცებებზე გაამახვილეს.
აპრილში, ჩადემას ლიდერი, ტუნდუ ლისუ დააკავეს.
სასამართლომ იგი სახელმწიფო ღალატში დამნაშავედ ცნო და სიკვდილით დასჯა მიუსაჯა.
სამია სულუჰუ ჰასანმა პრეზიდენტის თანამდებობა 2021 წელს ყოფილი პრეზიდენტის, ჯონ მაგუფულის გარდაცვალების შემდეგ დაიკავა.
