აშშ-ის პრეზიდენტის, დონალდ ტრამპის ადმინისტრაციამ მიიღო გადაწყვეტილება ვენესუელაში ნარკოვაჭრობაში ჩართულ სამხედრო ობიექტებზე დარტყმების შესახებ.
ამის შესახებ ინფორმაციას Miami Herald და Wall Street Journal ავრცელებენ.
Miami Herald-ის წყაროები, რომლებიც სიტუაციას კარგად იცნობენ, ამბობენ, რომ დარტყმები შესაძლოა ნებისმიერ მომენტში განხორციელდეს.
დაგეგმილი თავდასხმები, რომელთა შესახებაც ასევე იტყობინება Wall Street Journal, ნარკოვაჭრობისთვის გამოყენებულ სამხედრო ობიექტების წინააღმდეგ იქნება მიმართული.
აშშ-ში მიიჩნევენ, რომ ნარკოტიკებით ვაჭრობას ახორციელებს ორგანიზაცია, რომელსაც ხელმძღვანელობს ვენესუელის დიქტატორი ნიკოლას მადურო და რომელსაც აკონტროლებენ მისი რეჟიმის მაღალი თანამდებობის პირები.
წყაროებმა Herald-ს განუცხადეს, რომ ამერიკულ დარტყმებს „დღეებში ან თუნდაც საათებში“ არა მხოლოდ სამხედრო ობიექტების განადგურება, ~არამედ კარტელის ხელმძღვანელობის განადგურებაც შეუძლია.
The Wall Street Journal -ის ცნობით, ტრამპის ადმინისტრაციამ ვენესუელაში სამიზნეები განსაზღვრა, მათ შორის სამხედრო ობიექტები, რომლებიც ნარკოტიკების კონტრაბანდისთვის გამოიყენება.
თუ ტრამპი გადაწყვეტს მათ წინააღმდეგ საჰაერო დარტყმების განხორციელებას, ეს ვენესუელის ლიდერისთვის ნიკოლას მადუროსთვის მკაფიო სიგნალი იქნება, რომ გადადგომის დროა.
აშშ-ის ოფიციალური პირების შეფასებით, ვენესუელური კარტელი ყოველწლიურად დაახლოებით 500 ტონა კოკაინის ექსპორტს ახორციელებს, რომელიც ევროპასა და შეერთებულ შტატებს შორის ნაწილდება.
„მადურო შესაძლოა მალე აღმოჩნდეს ხაფანგში და ვერ შეძლოს ქვეყნიდან გაქცევა, მაშინაც კი, თუ ამას გადაწყვეტს,“ - განუცხადა Miami Herald-ს წყარომ.
აშშ-ის სამხედრო ძალებმა ბოლო დროს მნიშვნელოვნად გაზარდეს თავიანთი ყოფნა ვენესუელის სანაპიროსთან ოპერაციის ფარგლებში, რომელიც, თეთრი სახლის თქმით, მიზნად ისახავს ნარკოტიკებით ვაჭრობისა და კარაკასის რეჟიმთან დაკავშირებული კრიმინალური ქსელების წინააღმდეგ ბრძოლას.
შეერთებულმა შტატებმა უკვე რამდენიმე დარტყმა განახორციელა ნავებზე, რომლებსაც ნარკოტიკები გადაჰქონდათ. მათი უმეტესობა ვენესუელის სანაპიროსთან დააკავეს.
თავდასხმების შედეგად ნარკოტიკებით ვაჭრობაში ეჭვმიტანილი 61 ადამიანი დაიღუპა.
