აშშ-ის პრეზიდენტმა დონალდ ტრამპმა ვლადიმირ პუტინთან ბოლო საუბრის შემდეგ რამდენიმე განცხადება გააკეთა.
კერძოდ, ბრიფინგის დროს ამერიკის ლიდერმა განაცხადა, რომ ევროპას სურს უკრაინაში ომის დასრულება, მაგრამ „ეს არ გამოსდის“.
ამავდროულად, მისი თქმით, თავად ტრამპს, შეუძლია ამის გაკეთება.
აშშ-ის პრეზიდენტი აცხადებს, რომ პუტინმა საუბრისას სცადა მისი დარწმუნება არ მიაწოდოს უკრაინას Tomahawk-ის რაკეტები.
„რა თქმა უნდა [ის ცდილობდა], მაგრამ რას ფიქრობთ? რას იტყოდა: „გთხოვთ, მიჰყიდეთ [უკრაინას] ეს რაკეტები, ძალიან მადლობელი ვიქნები?“
გარდა ამისა, მისი თქმით, მან ასევე სცადა პუტინისთვის აზრის კითხვა ამ რაკეტების გადაცემასთან დაკავშირებით.
„მე პუტინს ვკითხე: „წინააღმდეგი ხომ არ იქნება, თქვენს მოწინააღმდეგეებს Tomahawk-ის რამდენიმე ათასი რაკეტა რომ გადავცე?“ მას ეს იდეა არ მოეწონა“, - თქვა აშშ-ის პრეზიდენტმა.
ამასთან, ტრამპმა არ თქვა, მიიღებს თუ არა უკრაინა ამ იარაღს.
ამერიკის ლიდერმა განაცხადა, რომ შეერთებულ შტატებს ძალიან სჭირდება Tomahawk-ები და ვაშინგტონს არ შეუძლია ამ რაკეტების საკუთარი მარაგის გამოყენება.
დონალდ ტრამპმა განაცხადა, რომ რუსეთის პრეზიდენტ ვლადიმირ პუტინთან მისი შეხვედრა ორ კვირაშია მოსალოდნელი. მანამდე მან განაცხადა, რომ ისინი უნგრეთის დედაქალაქ ბუდაპეშტში შეხვდებოდნენ.
ტრამპმა ასევე გაიმეორა, რომ ვოლოდიმირ ზელენსკის და პუტინს ცუდი ურთიერთობა აქვთ, ამიტომ მას მათთან ცალკე შეხვედრების ორგანიზება მოუწევს.
„პრობლემა არსებობს, ისინი [პუტინი და ზელენსკი] ერთმანეთს ვერ ეწყობიან. შეხვედრის ორგანიზება რთულია. შეგვიძლია ცალკე რაღაც გავაკეთოთ. ჩვენ ცალ-ცალკე შევხვდებით, მაგრამ თანასწორობის პრინციპით და ვისაუბრებთ“, - განმარტა აშშ-ის პრეზიდენტმა.
