რუსეთს აქვს ოკუპირებული საქართველოს ტერიტორიების 20% და სააკაშვილის ღალატი ვერავითარი შეღავათი ვერ არის რუსეთისთვის, ისევე როგორც რუსული ოკუპაცია ვერავითარი შეღავათი ვერ არის თქვენი პარტიის ღალატისთვის,- ამის შესახებ გმირთა მემორიალთან მისულმა საქართველოს პრემიერ-მინისტრმა ირაკლი კობახიძემ განაცხადა.
კითხვაზე, მიხეილ ყაველაშვილმა გაეროს გენერალური ასამბლეის ტრიბუნიდან საქართველოს ოკუპაციაზე საუბრისას რატომ არ ახსენა რუსეთი, კობახიძემ აღნიშნა, რომ ყაველაშვილმა ისაუბრა ყველა ეროვნულ საკითხზე.
„როცა ხართ „ნაცები“ [ჟურნალისტს] ასეთი გონორით არ უნდა ლაპარაკობდეთ ოკუპაციასთან დაკავშირებით. თქვენი შედეგია, თქვენი დამსახურებაა ის, რომ საქართველოს ტერიტორიების 20% არის ოკუპირებული და ასეთი გონორით თქვენს ადგილას, „ნაცის“ ადგილას მე არ ვისაუბრებდი. დღესაც შემიძლია გითხრათ, რომ რუსეთს აქვს ოკუპირებული საქართველოს ტერიტორიების 20%, მაგრამ ეს მოხდა თქვენი პარტიის დამსახურებით, თქვენმა პარტიამ დაიწყო ომი. ომი დაიწყო 2008 წელს, ამას მოჰყვა შედეგად საბოლოოდ ქვეყნის 20%-ის ოკუპაცია. რუსეთს აქვს ოკუპირებული საქართველოს ტერიტორიების 20% და სააკაშვილის ღალატი ვერავითარი შეღავათი ვერ არის რუსთისთვის, ისევე როგორც რუსული ოკუპაცია ვერავითარი შეღავათი ვერ არის თქვენი პარტიის ღალატისთვის. მიხეილ ყაველაშვილმა ისაუბრა ყველა ეროვნულ საკითხზე.“- განაცხადა კობახიძემ.
