აშშ-ის პრეზიდენტი დონალდ ტრამპი თეთრ სახლში სომხეთისა და აზერბაიჯანის ლიდერებთან შეხვედრას გეგმავს, რათა ორ ქვეყანას შორის ისტორიული სამშვიდობო შეთანხმების მიღწევა შეძლოს. ამის შესახებ The Washington Post ორ ამერიკელ მაღალჩინოსანზე დაყრდნობით იუწყება.
აზერბაიჯანის პრეზიდენტი და სომხეთის პრემიერ-მინისტრი ვაშინგტონში პარასკევს, 8 აგვისტოს ჩავლენ, აშშ-ის პრეზიდენტის მონაწილეობით სამშვიდობო მოლაპარაკებებისთვის.
გამოცემა აღნიშნავს, რომ შეხვედრა შესაძლოა გარდამტეხი მომენტი აღმოჩნდეს იმ ხანგრძლივ ჩიხში, რომელიც წარმოიშვა სსრკ-ს დაშლის შემდეგ, მთიანი ყარაბაღის გარშემო ტერიტორიული კონფლიქტის გამო.
რეგიონი, რომელიც ძირითადად ეთნიკური სომხებით იყო დასახლებული, აზერბაიჯანის კონტროლიდან 1990-იანი წლების დასაწყისში გამოვიდა, რამაც მხარეებს შორის შეიარაღებული კონფლიქტების სერია გამოიწვია.
2023 წლის სექტემბერში აზერბაიჯანის ძალებმა რეგიონი დაიბრუნეს, რის შედეგადაც სომხური მოსახლეობის დიდი ნაწილი იძულებული გახდა, საცხოვრებელი სახლები დაეტოვებინა.
ქვეყნებს შორის წინასწარი მოლაპარაკებები ივლისში არაბთა გაერთიანებულ საამიროებში გაიმართა, თუმცა საბოლოო შეთანხმების გამოცხადების გარეშე დასრულდა.
ამის მიუხედავად, ოფიციალურმა პირებმა ადრე განაცხადეს, რომ სამშვიდობო ხელშეკრულების წინასწარი ვერსიის შემუშავება მიმდინარეობდა.
