აშშ-ის პრეზიდენტმა დონალდ ტრამპმა მკაცრად დაგმო რუსეთის მიერ კიევზე განხორციელებული დარტყმა, რომლის შედეგადაც 28 ადამიანი დაიღუპა და 160-მდე დაშავდა.
„ის, რასაც რუსეთი აკეთებს, ამაზრზენია... ეს ბაიდენის ომია. ეს არ არის ჩემი ომი, მაგრამ მე ვთქვი, რომ თუ ხელისუფლებაში მოვალ, ამის შეჩერებას შევეცდები, მაგრამ მის ქმედებებს ძალიან სამწუხაროდ მივიჩნევ“, - განაცხადა მან თეთრ სახლში გამართულ პრესკონფერენციაზე.
ტრამპმა ასევე განაცხადა, რომ რუსეთის წინააღმდეგ სანქციებს გაამკაცრებს მას შემდეგ, რაც მას მშვიდობის მისაღწევად მიცემული 10-დღიანი ვადა ამოიწურება, თუმცა ეჭვი ეპარება, რომ ეს რაიმე გავლენას მოახდენს რუსეთის პრეზიდენტ ვლადიმირ პუტინზე.
„არ ვიცი, აწუხებთ თუ არა სანქციები. არ ვიცი, ექნება თუ არა ამას რამე შედეგი, მაგრამ ჩვენ ამას ვაპირებთ. ევროპა ძალიან განაწყენებულია. ეს არის ომი, რომელიც არასდროს უნდა მომხდარიყო. ეს არის ომი, რომელიც არ მოხდებოდა, მე რომ პრეზიდენტი ვყოფილიყავი“, – განაცხადა დონალდ ტრამპმა.
„ამჟამად კვირაში 7000 ჯარისკაცი იღუპება, უკრაინელი და რუსი... ქალაქებშიც იღუპება ხალხი, რადგან პუტინი მათ რაკეტებით ბომბავს. ვფიქრობ, ეს სირცხვილია“, - აღნიშნა ამერიკის ლიდერმა.
