აშშ-ის პრეზიდენტმა დონალდ ტრამპმა განაცხადა, რომ უკრაინას Patriot-ის ტიპის საზენიტო-სარაკეტო სისტემებს გაუგზავნის და აღნიშნა, რომ კიევს ისინი სჭირდება, რადგან რუსეთის ლიდერი ვლადიმირ პუტინი „კარგად საუბრობს, მაგრამ საღამოს ყველას ბომბავს“. იუწყება Reuters
„ჩვენ მათ Patriot -ებს გავუგზავნით, რომლებიც მათ უკიდურესად სჭირდებათ, რადგან პუტინმა ნამდვილად ბევრი ადამიანი გააკვირვა. კარგად ლაპარაკობს და საღამოს ყველას ბომბავს. მაგრამ აქ პატარა პრობლემაა. მე ეს არ მომწონს... ჩვენ არსებითად ვაპირებთ მათთვის სხვადასხვა სახის ძალიან დახვეწილი სამხედრო აღჭურვილობის გაგზავნას. ისინი 100%-ით გადაგვიხდიან და ზუსტად ეს გვინდა,“ - განაცხადა ტრამპმა.
ამის შესახებ მან ჟურნალისტებს ენდრიუსის საჰაერო ძალების ბაზაზე განუცხადა. ტრამპმა არ დააკონკრეტა, რამდენი Patriot-ის რაკეტის გაგზავნას გეგმავს უკრაინაში, თუმცა თქვა, რომ ევროკავშირი შეერთებულ შტატებს მათ საფასურს გადაუხდის.
ის ამ კვირაში ნატო-ს გენერალურ მდივან მარკ რუტეს შეხვდება, რათა უკრაინასა და სხვა საკითხებზე იმსჯელოს.
