რუსეთის პრეზიდენტ ვლადიმირ პუტინთან ბოლო საუბარი კარგი იყო, თუმცა ჯერ მისგან არაფერი გამოვიდა. ამის შესახებ აშშ-ის პრეზიდენტმა დონალდ ტრამპმა განაცხადა.
გარდა ამისა, ამერიკის პრეზიდენტმა კიდევ ერთხელ ახსენა, რომ რუსეთის მიერ დაწყებული სრულმასშტაბიანი ომის დაწყებიდან, ორივე მხრიდან კვირაში 5 ათასზე მეტი ჯარისკაცი იღუპება.
„მან [პუტინმა] ისაუბრა იმაზე, რაც სურდა და ისაუბრა იმაზე, რაც არ სურდა და ჩვენ კარგი საუბარი გვქონდა. თუმცა, ჯერ არაფერი გამოვიდა“, - თქვა ტრამპმა.
მისი თქმით, როგორც კი მოლაპარაკებებში გარკვეულ პროგრესს მიაღწევენ, იწყება „არასაჭირო აფეთქებები“ და პროცესი თავიდან იწყება.
გარდა ამისა, აშშ-ის პრეზიდენტმა ხაზგასმით აღნიშნა, რომ უკრაინაში მიმდინარე მოვლენები დრონების ომია. დრონები კი აშშ-ის ეროვნულ უსაფრთხოებას საფრთხეს უქმნის.
„მათ ორივე მხარე [უკრაინა და რუსეთი] იყენებს ისეთ დონეზე, რაც არავის წარმოედგინა. დიახ, ეს საშიშია. სინამდვილეში. ეს კარგი არ არის. ვის წარმოედგინა, რომ დრონი ასეთი ძლიერი იარაღი იქნებოდა, მაგრამ ის ბევრ სხვა იარაღს ცვლის, თვითმფრინავებსაც კი“, - აღნიშნა ტრამპმა.
