მილიარდერმა ილონ მასკმა სოციალურ ქსელ X-დან წაშალა პოსტი, რომელშიც წერდა, რომ აშშ-ის პრეზიდენტი დონალდ ტრამპი სექს-ვაჭრობაში ბრალდებული ჯეფრი ეპშტეინის ფაილებში ფიგურირებს
„დროა, მართლაც დიდი ბომბი ჩამოვაგდოთ. დონალდ ტრამპი ეპშტეინის ფაილებშია. ეს არის ნამდვილი მიზეზი, რის გამოც ეს ფაილები არ გამოქვეყნებულა. კარგ დღეს გისურვებ, დონალდ!“ - წერდა მასკი პოსტში, რომელიც მან 5 ივნისს გამოაქვეყნა.
მასკს პოსტის წაშლაზე კომენტარი არ გაუკეთებია.
ფინანსისტ ჯეფრი ეპშტეინის საქმეს, რომელიც სექს-ვაჭრობასა და არასრულწლოვნების მიმართ დანაშაულებებში იყო ბრალდებული, ფართო საზოგადოებრივი გამოხმაურება ჰქონდა მისი კავშირების გამო ცნობილ პოლიტიკოსებთან.
ეპშტეინს სექსუალური ტრეფიკინგისთვის ბრალი 2019 წელს წაუყენეს. ბრალის თანახმად, მან ათობით არასრულწლოვანი გოგო სექსუალურ ტრეფიკინგში ჩართო. ეპშტეინი ციხეში გარდაიცვალა, ოფიციალური ინფორმაციით, მან სიცოცხლე სუიციდით დაასრულა. სექსუალური ტრეფიკინგის ბრალდებით დააკავეს ასევე ეპშტეინის პარტნიორი ქალი გილეინ მაქსველი, რომელსაც 20 წლით თავისუფლების აღკვეთა მიუსაჯეს.
გასულ წელს გასაჯაროვდა სასამართლოს მასალების ნაწილი, რომელიც მოიცავს მსხვერპლთა ინტერვიუებს, ჩანაწერებს, საგამოძიებო ქმედებათა ანგარიშებს, რომლებიც კიდევ ერთხელ უსვამს იმას ხაზს, რომ ფინანსისტს ძალიან ბევრ გავლენიან ადამიანთან ჰქონდა ახლო ურთიერთობა.
ილონ მასკსა და დონალს ტრამპს შორის დაპირისპირება მას შემდეგ დაიწყო, რაც დონალდ ტრამპმა საბიუჯეტო კანონპროექტს მხარი დაუჭირა.
ილონ მასკმა აშშ-ის მთავრობის ეფექტიანობის დეპარტამენტის ხელმძღვანელის პოზიცია ცოტა ხნის წინ დატოვა. აღნიშნულ დეპარტამენტს, რომელიც ხარჯების შესამცირებლად შეიქმნა, მასკი 129 დღის განმავლობაში ხელმძღვანელობდა.
ამის შემდეგ მილიარდერი ბიზნესმენი თითქმის განუწყვეტლივ აკრიტიკებდა ტრამპის კანონპროექტს გადასახადების შემცირებისა და საბიუჯეტო ხარჯების შემცირების შესახებ. მასკმა 4 ივნისს X-ზე გამოქვეყნებულ პოსტში კანონპროექტს "გულისამრევი საშნელებაც" უწოდა და დაამატა: "სირცხვილი მათ, ვინც ამას მხარი დაუჭირა: თქვენ იცით, რომ არასწორად მოიქეცით".
კანონპროექტი ზოგიერთ სფეროში, მათ შორის თავდაცვისთვის და მიგრაციული პოლიტიკის გასატარებლად ხარჯების გაზრდას, სახელმწიფო ვალის ლიმიტის გაზრდას და საგადასახადო შეღავათებს ითვალისწინებს.
