აშშ-ის პრეზიდენტმა დონალდ ტრამპმა ორშაბათს, 5 მაისს, ღამით გასცა ბრძანება კალიფორნიის ალკატრასის ციხის ხელახალი გახსნის შესახებ, რომელიც 1963 წელს დაიხურა.
"ჩვენ აღარ შევეგუებით ამ სერიულ დამნაშავეებს, რომლებიც ჩვენს ქუჩებში თესავს ბოროტებას, სისხლისღვრას და ქაოსს", - წერს ტრამპი სოციალურ ქსელში.
"სწორედ ამიტომ, დღეს ვავალებ ციხეების ბიუროს, იუსტიციის სამინისტროსთან, FBI-სთან და შინაგანი უსაფრთხოების სამინისტროსთან ერთად, გახსნან სრულად განახლებული და მნიშვნელოვნად გაფართოებული ალკატრასი, რათა იქ ამერიკის ყველაზე სასტიკი და საშიში დამნაშავეები განათავსონ. ალკატრასის კვლავ გახსნა გახდება კანონის, წესრიგისა და სამართლიანობის სიმბოლო. ჩვენ ამერიკას კვლავ დიდებულს გავხდით".
ყოფილი ფედერალური უმკაცრესი რეჟიმის საპატიმრო ალკატრასი მდებარეობს ალკატრასის კუნძულზე სან ფრანცისკოს ყურეში.
საპატიმრო აშენდა 1912 წელს ძველი ციხე-სიმაგრის ადგილას და თავდაპირველად სამხედრო ციხედ გამოიყენებოდა. 1936 წელს ის იუსტიციის დეპარტამენტს გადაეცა, რომელმაც აღადგინა და მეტად დაცული გახადა. საპატიმროში აგზავნიდნენ განსაკუთრებით საშიშ დამნაშავეებს. სასჯელს აქ იხდიდა ცნობილი განგსტერი ალ კაპონე.
ალკატრასი შეერთებულ შტატებში ყველაზე მკაცრი რეჟიმის ციხედ ითვლებოდა. პატიმრები იუწყებოდნენ ციხის მცველების სისასტიკისა და არაადამიანური პირობების შესახებ. ციხის ფუნქციონირების განმავლობაში აღრიცხულია გაქცევის 14 მცდელობა. ყველა მათგანი წარუმატებლად დასრულდა.
1963 წელს ციხე დაიხურა. მას შემდეგ იქ განთავსებულია მუზეუმი, რომელიც პოპულარულია ტურისტებში.
