The Times-ის ცნობით, აშშ-ის პრეზიდენტის დონალდ ტრამპის გეგმა ითვალისწინებს რუსეთის მიერ ოკუპირებულ უკრაინის ტერიტორიებზე კონტროლის შენარჩუნებას და ეს პირობა „საბოლოოა“.
როგორც გამოცემა აშშ-ის პრეზიდენტის სპეციალურ წარმომადგენელ სტივ უიტკოფთან დაახლოებულ წყაროზე დაყრდნობით აღნიშნავს, საუბარია კიევისთვის ულტიმატუმზე: ან დათანხმდეს, ან დაკარგავს აშშ-ის მხარდაჭერას.
წყაროს ცნობით, ტრამპი მიიჩნევს, რომ უკრაინის პრეზიდენტს „ფაქტობრივად სხვა გზა არ აქვს“, გარდა იმისა, რომ შეთავაზებულ გეგმას დაეთანხმოს. ის იმუქრება, რომ მომავალ კვირას სამშვიდობო პროცესიდან გავა, თუ შეთანხმება ვერ მიიღწევა.
უიტკოფის მიერ მოსკოვისა და კიევისთვის წარდგენილი ამერიკული წინადადება გულისხმობს აშშ-ს მიერ ყირიმზე რუსეთის კონტროლის ოფიციალურ ცნობას, ასევე რუსეთის მიერ 2022 წელს სრულმასშტაბიანი შეჭრის შემდეგ სამხრეთ და აღმოსავლეთ უკრაინის ნაწილებზე რუსეთის კონტროლის ფაქტობრივ აღიარებას.
ევროპა-უკრაინის წინადადების თანახმად კი, ტერიტორიებზე კონტროლის საკითხი მხოლოდ ცეცხლის შეწყვეტის შეთანხმების მიღწევის შემდეგ განიხილება.
„ტრამპის აზრით, ეს მიწა დაპყრობილია და ის აღარ დაბრუნდება. ამჟამად შეთავაზებული შეთანხმება ითვალისწინებს, რომ რუსეთის მიერ ოკუპირებული ტერიტორიებზე მის კონტროლი შემარჩუნდება. რუსეთი უკან არ დაიხევს. ეს საკითხი საბოლოოა“, - განაცხადა წყარომ.
წყაროს თქმით, აშშ-შიფიქრობენ, რომ თუ უკრაინა უარს იტყვის შეთანხმებაზე, ომი თვეების ან წლების განმავლობაში გაგრძელდება, კიევი კი ევროპისგან დაფინანსებასა და იარაღის მიწოდებაზე იქნება დამოკიდებული.
„აშშ-ის მხრიდან დაფინანსების შემცირებას იგივე ეფექტი ექნება, რაც იარაღის მიწოდების შემცირებას [წელს], რადგან უკრაინა ამ სახსრებს სხვა მოკავშირეებისგან იარაღის შესაძენად იყენებს.
აშშ-ის ოფიციალური პირები ასევე მიიცნევენ, რომ ევროპაში საზოგადოებრივი აზრი შესაძლოა უკრაინის მხარდასაჭერად მასშტაბური ხარჯების წინააღმდეგ შეიცვალოს, განსაკუთრებით ევროკავშირის სავარაუდო რეცესიის გათვალისწინებით, რაც ნაწილობრივ ტრამპის ტარიფებით არის გამოწვეული,“ - აღნიშნა წყარომ.
