აშშ-ის პრეზიდენტმა დონალდ ტრამპმა განაცხადა, რომ ირანი განზრახ აჭიანურებს ახალ ბირთვულ შეთანხმებას და დაემუქრა შესაძლო სამხედრო დარტყმებით ბირთვული იარაღის შემუშავების საპასუხოდ.
„ირანი საკმარისად ახლოს არის ბირთვული იარაღის ფლობასთან, ამიტომ მოლაპარაკებები სწრაფად უნდა წარიმართოს. და თუ ჩვენ მართლაც მოგვიწევს რაიმე რთულის გაკეთება, ჩვენ ამას გავაკეთებთ", - განაცხადა ტრამპმა.
ტრამპი ფიქრობს, რომ ირანი ფეხს ითრევს, რადგან ბირთვული მოლაპარაკებების შემდეგი რაუნდი შაბათამდე არ არის დაგეგმილი, რაც, მისი თქმით, ძალიან დაგვიანებულია.
აშშ-ის პრეზიდენტმა ასევე ხაზგასმით აღნიშნა, რომ ირანმა უარი უნდა თქვას ბირთვული იარაღის ფლობის იდეაზე, რადგან ეს მისთვის მიუღებელია.
კითხვაზე, ითვალისწინებს თუ არა შეერთებული შტატების საპასუხო ვარიანტები სამხედრო დარტყმას თეირანის ბირთვულ ობიექტებზე, ტრამპმა უპასუხა: „რა თქმა უნდა, დიახ“.
