აშშ-ის პრეზიდენტმა დონალდ ტრამპმა, სულ მცირე, 10%-იანი საბაზისო ტარიფი თითქმის ყველა ქვეყანას დაუწესა.
ტრამპმა აჩვენა დიაგრამა, სახელწოდებით „ორმხრივი ტარიფები“, რომელშიც შედარებულია სხვა ქვეყნების მიერ აშშ-ისთვის დაწესებული ტარიფები ვაშინგტონის გადასახადებთან.
დიაგრამაზე ჩანს, რომ აშშ დიდ ბრიტანეთს 10%-იან, ევროკავშირს კი 20%-იან ტარიფს დაუწესებს.
"ისინი გვახდევინებენ, ჩვენც ვახდევინებთ. როგორ შეიძლება, ვინმე ამაზე გაბრაზდეს". - თქვა ტრამპმა.
აშშ-ს პრეზიდენტმა განსაკუთრებით ხაზი გაუსვა ჩინეთისა და ევროკავშირის მხრიდან დაწესებულ ტარიფებს – "ისინი გვატყუებენ, ეს ძალიან სევდიანი სანახაობაა".
ტრამპმა ასევე აღნიშნა, რომ უცხოეთში წარმოებულ ყველა ავტომობილზე 25%-იანი ტარიფი დღეიდან ამოქმედდება.
ამასთან, დონალდ ტრამპის თქმით, იმ კომპანიებისთვის, რომლებიც თავიანთ პროდუქტს აშშ-ში აწარმოებენ, ტარიფები არ დაწესდება.
აშშ-ს პრეზიდენტის თქმით, ეს დღე აშშ-ს ისტორიაში შევა, როგორც ინდუსტრიის გათავისუფლების დღე. მისი თქმით, ამ გადაწყვეტილებით აშშ-სთვის "ოქროს ხანა" დაიწყება.
“დღეს აშშ-ის ეკონომიკური დამოუკიდებლობის გამოცხადება აღინიშნება. ახლა ჩვენი აყვავების დროა. სამუშაო ადგილები და ადგილობრივი წარმოება ამერიკაში დაბრუნდება. ეს ნამდვილად იქნება ამერიკის ოქროს ხანა. როდესაც საქმე ვაჭრობას ეხება, ხანდახან მეგობარი მტერზე უარესია. სამხრეთ კორეაში წარმოებული მანქანების 80%-ზე მეტი იყიდება სამხრეთ კორეაში, ხოლო იაპონიაში გაყიდული მანქანების 90%-ზე მეტი დამზადებულია იაპონიაში და აშშ-ში დამზადებული მანქანები მხოლოდ მცირე ნაწილს წარმოადგენს ამ ქვეყნებში. მაგალითად, „ფორდი“ ძალიან ცოტას ყიდის სხვა ქვეყნებში. დისბალანსმა გაანადგურა აშშ-ის მრეწველობა, ამიტომ ჩვენ დავაწესებთ 25%-იან ტარიფს უცხოური წარმოების ყველა ავტომობილზე. ჩვენ ვზრუნავთ ქვეყნებზე მთელი მსოფლიოს მასშტაბით, ახლა დროა, აშშ-მა იზრუნოს საკუთარ ხალხზე“, – განაცხადა ტრამპმა.
