აშშ-ს პრეზიდენტის, დონალდ ტრამპის მრჩეველმა ეროვნული უსაფრთხოების საკითხებში, მაიკ უოლცმა Fox News-ის ეთერში თეთრ სახლში დონალდ ტრამპს, ჯეი დი ვენსს ვოლოდიმირ ზელენსკის შორის დაპირისპირების შესახებ ილაპარაკა. მისი თქმით, ოვალურ კაბინეტში განვითარებული მოვლენები დაგეგმილი არ ყოფილა.
უოლცის თქმით, საჯარო დაპირისპირების შემდეგ, ტრამპის ადმინისტრაციის წევრებმა ურჩიეს მას არ გაეგრძელებინა შეხვედრა, შემდეგ კი ამის შესახებ უკრაინულ მხარეს განუცხადეს.
მან უარყო მოსაზრება, რომ ოვალურ კაბინეტში განვითარებული მოვლენები იყო „ერთგვარი ჩასაფრება“.
”ჩვენ გვქონდა მშვენიერი გარემო აღმოსავლეთ ოთახში ორივე ლიდერისთვის, რათა ხელი მოეწერათ შეთანხმებას, რომელიც დააკავშირებდა შეერთებულ შტატებსა და უკრაინას ეკონომიკურად ერთი თაობის განმავლობაში, იმ კრიტიკულ მინერალებზე, რომლებიც ჩვენ გვჭირდება, ეკონომიკურ ინვესტიციებზე, რომლებიც მათ სჭირდებათ”, - თქვა ტრამპის მრჩეველმა.
მისი თქმით, შეთანხმება „შეიძლება და უნდა ყოფილიყო პოზიტიური მომენტი უკრაინისთვის“, რის შემდეგაც აშშ-ს შეძლებდა გაეგრძელებინა მოლაპარაკებები“ რუსეთთან „ომის დასრულების შესახებ“.
„მაგრამ სამაგიეროდ, რაც ცხადი გახდა - და ვფიქრობ, ეს არის ის, რამაც ასე იმედი გაუცრუა და გულწრფელად აღაშფოთა პრეზიდენტი, რომ გაუგებარი დარჩა, ზელენსკის ნამდვილად სურდა ბრძოლის შეწყვეტა თუ არა“, - თქვა უოლცმა.
მისი თქმით, კამათის შემდეგ უკრაინის პრეზიდენტმა, სავარაუდოდ, ვერ გაიგო, რა მოხდა, მის ელჩსა და მრჩეველს კი "პრაქტიკულად ცრემლები მოსდიოდათ" და შეხვედრის განახლებას ითხოვდნენ.
„და ბოლოს მე ვუთხარი: „მისმინეთ, ბატონო პრეზიდენტო, აქ დრო თქვენს მხარეს არ მუშაობს. ბრძოლის ველზე დრო თქვენს მხარეს არ არის. მსოფლიოში არსებული ვითარების გათვალისწინებით, დრო თქვენს მხარეს არ არის და რაც მთავარია, USAID-ის და გადასახადის გადამხდელების ტოლერანტობა არ არის შეუზღუდავი“, - განაცხადა უოლცმა.
