თეთრი სახლის მრჩეველმა ეროვნული უსაფრთხოების საკითხებში, მაიკ უოლცმა განაცხადა, რომ უკრაინის ბოლოდროინდელი განცხადებები დონალდ ტრამპის ადმინისტრაციის მიერ განიმარტება, როგორც "შეურაცხყოფა" მის მიმართ.
უოლცს სთხოვეს კომენტარი გაეკეთებინა ტრამპის პოსტზე, სადაც მან ზელენსკის "დიქტატორი" უწოდა და განემარტა, თუ ვინ არის დამნაშავე უკრაინაში მიმდინარე ომში - ზელენსკი თუ პუტინი, აშშ-ის პრეზიდენტის აზრით.
ტრამპის მრჩეველმა კითხვაზე პირდაპირი პასუხი არ გასცა, თუმცა განაცხადა, რომ აშშ-ის პრეზიდენტის „იმედგაცრუება ზელენსკის მიმართ“ რამდენიმე კომპონენტისგან შედგება.
„პირველ რიგში, ღრმა მადლიერება უნდა იყოს იმისთვის, რაც გააკეთა ამერიკელმა ხალხმა, გადასახადის გადამხდელებმა, რაც გააკეთა ტრამპმა თავის პირველ საპრეზიდენტო ვადაში და რაც ჩვენ გავაკეთეთ მას შემდეგ.
ამიტომ, კიევიდან წამოსული ზოგიერთი განცხადება - გულწრფელად რომ ვთქვათ, შეურაცხყოფაა ტრამპის მიმართ - მიუღებელია“, - განაცხადა მან, თუმცა არ დაუკონკრეტებია რა განცხადებებზე იყო საუბარი.
მეორე ფაქტორად უოლცმა დაასახელა უკრაინის წიაღისეულის რესურსებში ინვესტირების შესახებ შეთანხმება, რომელზეც უკრაინა ჯერჯერობით უარს ამბობს.
ტრამპის მრჩეველმა თქვა, რომ შეთანხმება არა მხოლოდ წარმოადგენს „უკრაინის გრძელვადიან უსაფრთხოებას“, არამედ „ჩვენ გვაქვს ვალდებულება ამერიკელი გადასახადის გადამხდელების წინაშე დავეხმაროთ მათ ასობით მილიარდის დაბრუნებაში“.
„კონსტრუქციული საუბრების ნაცვლად, თუ როგორი შეიძლება იყოს ეს შეთანხმება, ჩვენ მოვისმინეთ ბევრი განცხადება მედიაში, რომელიც უკიდურესად იმედგამაცრუებული იყო“, - თქვა მან.
