ნატოს გენერალური მდივნის მარკ რუტეს განცხადებით, კიევმა უნდა მიიღოს მონაწილეობა მოლაპარაკებებში, რომელიც უკრაინაში ცეცხლის შეწყვეტას ეხება. ამის შესახებ მან 13 თებერვალს, ბრიუსელში ნატოს თავდაცვის მინისტერიალის დაწყებამდე განაცხადა.
"სასიცოცხლო მნიშვნელობისაა, რომ ამ მოლაპარაკებების ნებისმიერი შედეგი იყოს მტკიცე და ხანგრძლივი", - თქვა რუტემ "და რომ უკრაინა მჭიდროდ უნდა იყოს ჩართული ყველაფერში, რაც ეხება უკრაინას".
თავის მხრივ, გერმანიის თავდაცვის მინისტრმა ბორის პისტორიუსმა განაცხადა, რომ დონალდ ტრამპის მოლაპარაკებები ვლადიმირ პუტინთან უკრაინის შესახებ "სამწუხაროა".
პისტორიუსის განცხადებით, აშშ-ს ადმინისტრაცია რუსეთთან დათმობაზე წავიდა ჯერ კიდევ უკრაინაზე სამშვიდობო მოლაპარაკებების დაწყებამდე.
"ჩემი აზრით, უმჯობესი იქნება უკრაინის ნატო-ში შესაძლო გაწევრიანებაზე ან შესაძლო ტერიტორიულ დანაკარგზე ვისაუბროთ მოლაპარაკებების მაგიდასთან", - დასძინა მან.
შეგახსენებთ, 12 თებერვალს სატელეფონო საუბარი შედგა აშშ-სა და რუსეთის პრეზიდენტებს შორის. საუბრის თემა, როგორც ცნობილია, იყო უკრაინაში ომის დასრულება. პუტინთან საუბრის შემდეგ, ტრამპმა უკრაინის პრეზიდენტ ზელენსკის დაურეკა.
მოგვიანებით, თეთრ სახლში ჟურნალისტებთან საუბრისას, ტრამპმა განაცხადა, რომ შესაძლოა, პუტინს საუდის არაბეთში შეხვდეს. მან ასევე თქვა, რომ უკრაინის ნატოში გაწევრიანება შეუსაბამოა და უკრაინის მიერ ყველა დროებით ოკუპირებული ტერიტორიის დაბრუნება "ნაკლებად სავარაუდოა".
