"იუკოსის" ყოფილი ხელმძღვანელის მიხეილ ხოდორკოვსკის ადვოკატი ვადიმ კლიუვგანტი მიიჩნევს, რომ ნავთობის კორპორაციის ხელმძღვანელის მეორე საქმის განაჩენი უკვე გამოტანილი იყო მაშინ როდესაც იგი ჯერ კიდევ სასამართლოს გადაეგზავნა. ამას გარდა, იურისტი დარწმუნებულია, რომ განაჩენი მოსამართლე დანილკინს არ შეუდგენია და განაჩენის ნამდვილი ავტორის მოძებნას აპირებს.
დღეს მოწყობილ პრესკონფერენციაზე ადვოკატმა ასევე განაცხადა, რომ არც მიხეილ ხოდორკოვსკი და არც პლატონ ლებედევი შეწყალების თხოვნას არ აპირებენ. ამასთან ერთად ხოდორკოვსკი ადვოკატები შიშობენ, რომ მათი კლიენტი შესაძლოა მკვლელობებში დაადანაშაულონ.
ხოდორკოვსკის დაცვა აცხადებს, რომ შესაძლოა "იუკოსის" ყოფილი ხელმძღვანელის წინააღმდეგ ახალი სისხლის სამართლის საქმე აღიძრას - პიროვნების წინააღმდეგ მძიმე დანაშაულის მუხლით.
"იმ სახის დანაშაულებებზე თუ ვისაუბრებთ, ისინი აბსოლუტურად ირაციონალურებად და შეუძლებლად მიმაჩნია, თუმცა მაინც ვუშვებ სადღაც, რომ ასეთი რამ შეიძლება მოხდეს. არ გამიკვირდება თუკი ისინი ისტერიკაში ამაზეც წავლენ", _ აცხადებს ხოდორკოვსკის ადვოკატი იური შმიდტი.
აღსანიშნავია, რომ პუტინი აკეთებდა რა ხოდორკოვსკის საქმეზე კომენტარს მკვლელობებზე საუბრობდა.
"მე მასზე პირადად არ ვსაუბრობ. შეგახსენებთ, რომ "იუკოსის" უსაფრთხოების ყოფილი ხელმძღვანელი ალექსეი პიშუგინი ციხეში მკველობის გამო ზის. მათ ნეფტეიუგანსკის მერი პეტუხოვი არ მოეწონათ და მოკლეს. ქალმა აქ მოსკოვში არ მისცა მათ თავიის პატარა ფართი, რომელიც მათ სურდათ - მოკლეს. ქილერი რომელიც დაიქირავეს - მოკლეს, მხოლოდ მისი ტვინი იპოვეს ფარეხში. რა უსაფრთხოების სამსახურის ხელმძღვანელი თავად, საკუთარი ინიციატივით იღებდა ამ გადაწყვეტილებებს?", _ კითხვა დასვა მაშინ ვლადიმერ პუტინმა.
შეგახსენებთ, რომ მოსკოვის სასამართლომ "იუკოსის" ყოფილ ხელმძღვანელს, მიხაილ ხოდორკოვსკისა და "მენატების" ხელმძღვანელს პლატონ ლებედევს 13,5 წლით თავისუფლების აღკვეთა მიუსაჯა.
განაჩენში ნათქვამია, რომ ხოდორკოვსკი და ლებედევი დამნაშავედ არინ ცნობილები მიტაცებისა და ფულის გათეთრების მუხლებით, რის გამოც მათ საერთო რეჟიმის კოლონიაში 13,5 წლის გატარება მოუწევთ.
ბრალდების მხარე რუსი ბიზნესმენებისთვის 14 წლით თავისუფლების აღკვეთას ითხოვდა.
თავდაპირველად ხოდორკოვსკისა და ლებედევს 2005 წელს 8 წლით თავისუფლების აღკვეთა მიუსაჯეს. ბრალად მათ თაღლითობა და გადასახადების გადაუხდელობა ედებოდათ. 2006 წელს მათ წინააღმდეგ სისხლის სამართლის მეორე საქმე აღიძრა, რომლის ფარგლებშიც პროკურორები მათთვის 14 წლით თავისუფლების აღკვეთას მოითხოვენ. ამ საქმის მიხედვით მათ უკვე ბრალი ედებათ 200 მილიონ ტონა ნავთობის დატაცებაში, უკანონოდ გამომუშავებული თანხის მითვისებაში და 3 მილიარდ რუსულ რუბლად ღირებული აღმოსავლური ნავთობის კომპანიის 38-პროცენტიანი აქციების პაკეტის მისაკუთრებაში.
ე. წ. "იუკოსის" საქმე, ბოლო წლებში რუსეთში არსებულ საქმეთაგან ერთ-ერთი ყველაზე "ხმამაღალია". რუსეთის სამართალდამცავმა ორგანოებმა იმ დროისთვის ქვეყანაში ყველაზე მსხვილი კომპანიის ხელმძღვანელობა მთელ რიგ ეკონომიკურ დარღვევებში დაადანაშაულეს. შედეგად "იუკოსი" გაკოტრდა, მისი აქტივები კი სახელმწიფო კომპანია "როსნეფტს" გადაეცა. დასავლეთი დღემდე მიიჩნევს, რომ "იუკოსის" საქმე პოლიტიკურად მოტივირებულია, თუმცა რუსეთის ხელისუფლება ყოველივეს კატეგორიულად უარყოფს.
ხოდორკოვსკის ხშირად ვლადიმერ პუტინის პირად პატიმარს უწოდებენ. რამდენიმე დღის წინ პუტინმა განაცხადა - "ქურდი ციხეში უნდა იჯდეს, ხოლო რაც შეეხება ხოდორკოვსკის, მას ბრალად დატაცება აქვს წაყენებული, თან საკმაოდ სოლიდური".
პირადად ხოდორკოვსკი თავის წინააღმდეგ აღძრულ მეორე სისხლის სამართლის საქმეს პოლიტიკურს და კორუფციულად მოტივირებულს უწოდებს. მისი თქმით, ამ პროცესის ინიციატორები იყვნენ ადამიანები, რომლებსაც მისი ციხიდან გამოსვლა არ სურთ. მის წინააღმდეგ სისხლისსამართლებრივ დევნას კი ხოდორკოვსკი იმით ხსნით, რომ იგი დამოუკიდებელ ოპოზიციას უჭერდა მხარს.
