საქართველოს პარლამენტის თავმჯდომარემ დავით ბაქრაძემ და ლიტვის ელჩმა იონას პასლაუსკასიმ ლიტვის ტრაგედიის 20 წლისთავთან დაკავშირებით 9 აპრილის მემორიალი გვირგვინით შეამკეს და წუთიერი დუმილით საქართველოს დამოუკიდებლობისათვის დაღუპულთა სულებს პატივი მიაგეს.
დავით ბაქრაძის განცხადებით, საბჭოთა კავშირის დაშლა სწორედ იმ ადამინების გმირობის შედეგია, რომლებიც ლიტვისა და საქართველოს დამოუკიდებლობისთვის ბრძოლისას დაიღუპნენ.
"დღეს პატივს მივაგებთ ადამიანების ხსოვნას, რომლებიც ლიტვის დამოუკიდებლობისათვის ბრძოლაში დაიღუპნენ. ლიტვაში მიმდინარე მოვლენების პარალელურად დამოუკიდებლობისათვის ბრძოლა მიმდინარეობდა საქართველოში.
სწორედ ამ ბრძოლებისას დაღუპული ადამიანების გმირობამ განაპირობა საბჭოთა კავშირის დაშლა და ლიტვისა და საქართველოს დღევანდელი დამოუკიდებლობა", - განაცხადა დავით ბაქრაძემ.
აღნიშნულის შემდეგ პარლამენტის თავმჯდომარემ და საქართველოში ლიტვის საგანგებო და სრულუფლებიანმა ელჩმა ვილნიუსის სკვერში გადაინაცვლეს და 20 წლის წინ ტრაგიკულად დაღუპულთა საპატივსაცემოდ ლიტვური ტრადიციის მიხედვით კოცონი დაანთეს, რომელსაც პარლამენტის თავმჯდომარესთან ერთად პარლამენტის წევრები, უშიშროების საბჭოს მდივანი, გიორგი ბოკერია და რეინტეგრაციის საკითხებში სახელმწიფო მინისტრი მირზა დავითაია დაესწრნენ.
შეგახსენებთ, რომ 1991 წლის 13 იანვარს ვილნიუსში, დამოუკიდებლობის გამოცხადებიდან 9 თვის თავზე საბჭოთა ჯარი ლიტვისთვის დამოუკიდებლობის წართმევას ძალისმიერი მეთოდებით შეეცადა, რასაც 14 მშვიდობიანი მოქალაქის სიცოცხლე შეეწირა.
