ამერიკელი სენატორის ჯოზეფ ლიბერმანის განცხადებით, იმედები თავისუფალ, დემოკრატიულ რუსეთზე კვლავ არარეალიზებულია.
ამის შესახებ სენატრმა საქართველოს პრეზიდენტ მიხეილ სააკაშვილთან შეხვედრისას აღნიშნა.
"დიდი წარმატება იყო საბჭოთა კავშირის დაშლა. ეს იყო დიდი მიღწევა მსოფლიოში.
ჯერ კიდევ პრეზიდენტი ნიქსონი ცდილობდა, რომ დაეცა დემოკრატიული ძალები თავად რუსეთსა და საბჭოთა კავშირის ყოფილ ქვეყნებში, თუმცა მრავალი წლის შემდეგაც მთავარი მიზანი - თავისუფლების განმტკიცება, მიღწეული არ არის. იმედები, თავისუფალ, თანამედროვე რუსეთზე არარეალიზებულია", - განაცხადა სენატორმა.
მისივე განმარტებით, რუსეთის ფედერაციას "საოცრად მზარდი ავტოკრატიული მთავრობა" მართავს, რომელიც ზღუდავს ადამიანის უფლებებს.
"იქ არ არის კანონის უზენაესობა. ის კვლავ ცუდად ეპყრობა თავის მეზობელს, მათ შორის დასავლეთ ევროპაშიც. ის ამისთვის აგრესიულ ტაქტიკას მიმართავს _ იყენებს ენერგორესურსებს, კიბერშეტევებს, საქართველოს შემთხვევაში კი ეს იყო აფხაზეთის და სამხრეთ ოსეთის დაპყრობა, რაც საქართველოს ტერიტორიის 20 %-ს შეადგენს", - განმარტა მან.
აღნიშნულ კონტექსტში, ამერიკელმა სენატორმა ისიც დასძინა, რომ შეერთებული შტატები საქართველოს გვერდით იქნება იმისთვის, რომ ქვეყნის დეოკუპაცია მოხდეს.
"ჩვენ ვიქნებით თქვენს გვერდით ყოველთვის და იმისთვის, რომ ეს ყველაფერი უკან დავაბრუნოთ. ჩვენ ვამაყობთ თქვენი ლიბერალური რეფორმებით, იმით რომ საქართველომ შეამცირა კორუფცია, რომ რეფორმების გზაზე დგახართ. რაც უფრო დემოკრატიული იქნებით, მით უფრო სოლიდური იქნება ნატოს, ევროკავშირის დახმარება", - დასძინა მან.
შეგახსენებთ, რომ საქართველოს პრეზიდენტმა ამერიკელი სენატორი ჯოზეფ ლიბერმანი დღეს წმინდა გიორგის სახელობის გამარჯვების ორდენით დააჯილდოვა.