უკრაინის საგარეო საქმეთა მინისტრმა დმიტრო კულებამ 26 აგვისტოს რუსეთის მასირებული თავდასხმის შემდეგ განაცხადა, რომ პარტნიორებს შეუძლიათ უკრაინას დაეხმარონ რუსული ტერორის დასასრულებლად ორი გადაწყვეტილების მიღებით.
„ჩვენს პარტნიორებს შეუძლიათ ორი კონკრეტული გადაწყვეტილება მიიღონ, რათა დაგვეხმარონ სწრაფად დავასრულოთ რუსული ტერორი.
პირველ რიგში, დაადასტურონ უკრაინის უფლება განახორციელოს შორ მანძილზე დარტყმები რუსეთის ტერიტორიაზე ყველა ლეგიტიმურ სამხედრო სამიზნეზე.
მეორეც, შეთანხმდნენ პარტნიორების საჰაერო თავდაცვის შესაძლებლობების გამოყენებაზე რაკეტებისა და უპილოტო თვითმფრინავების ჩამოსაგდებად, რომლებიც უახლოვდებიან მათ საჰაერო სივრცეს“, - განაცხადა კულებამ.
კულებამ ხაზგასმით აღნიშნა, რომ არცერთი ეს გადაწყვეტილება არ წარმოადგენს ესკალაციას.
„პირიქით, ისინი შეაკავებენ რუსეთს, ხელს შეუწყობენ ტერორის შემცირებას და მათთან დაკავშირებულ მსხვერპლთა რაოდენობას, ვიმოქმედოთ ახლავე და არა მოგვიანებით“, - აღნიშნა კულებამ.
