საზოგადოებრივი მოძრაობა "სოლიდარობა უკანონო პატიმრებს" თავმჯდომარე ეკა ბესელია "კოკოითი ფანდარასტის" ხელმძღვანელის ვლადიმერ სანაკოევის აღიარებას გამოეხმაურა.
როგორც ბესელიამ "ჯი-ეიჩ-ენს" განუცხადა, ვლადიმერ სანაკოევის აღიარება საინტერესო გახლდათ, თუმცა ბევრად უფრო უცნაურია საქართველოს ხელისუფლების პოზიცია.
"კარგად მახსოვს, თუ როგორ უანგაროდ ეხმარებოდა სანაკოევი საქართველოს ხელისუფლებას თავისი პიარ-აქციებით. არაა გამორიცხული, მომავალშიც გამოიკვეთოს, რომ ჩვენი ხელისუფლების სხვა წარმომადგენლებიც რუსულ ინტერესს ატარებდნენ და მათი სპეცსამსახურების დავალებას ასრულებდნენ,"_აღნიშნა ბესელიამ.
ეკა ბესელია თავისი ყოფილი თანაპარტიელის ირაკლი ოქრუაშვილის შესახებ ვლადიმერ სანაკოევის შეფასებებს უპასუხოდ ტოვებს და აცხადებს, რომ იმდროინდელი შიდა კულუარები მისთვის უცნობი იყო.
"ეს ის პერიოდია, როცა შორს ვიყავი ამ ამბებისგან. ამდენად, მაშინდელი კულუარული მოვლენების შესახებ ინფორმაციას არ ვფლობ,"_აცხადებს ბესელია.
შეგახსენებთ, "კოკოითი ფანდარასტის" ხელმძღვანელი ვლადიმერ სანაკოევი რუსულ სპეცსამსახურებთან თანამშრომლობას აღიარებს და თავდაცვის ყოფილი მინისტრის ირაკლი ოქრუაშვილის პოლიტიკიდან ჩამოშორებას საკუთარ დამსახურებად მიიჩნევს. სანაკოევის თქმით, ოქრუაშვილის თანამდებობაზე დარჩენის შემთხვევაში, იგი ძალის გამოყენებით ცხინვალს დაიმორჩილებდა, რაც სოჭის ოლიმპიადას ჩაშლას უქადდა.
