"ქართული პარტიის" წარმომადგენელი თეო ტლაშაძე მოძრაობა "კოკოითი ფანდარასტის" ყოფილი ხელმძღვანელის ვლადიმერ სანაკოევის რუსეთის აგენტობასთან დაკავშირებით კომენტარს არ აკეთებს.
ამ ეტაპზე ტლაშაძე ნაადრევად მიიჩნევს სანაკოევის მიერ ირაკლი ოქრუაშვილის შესახებ გამოთქმული სკანდალური კომენტარის შეფასებასაც.
"სანაკოევზე კომენტარის გაკეთება ამ ეტაპზე არ ღირს. დავფიქრდებით და გადავწყვეტთ, ღირს თუ არა ამ საკითხზე საუბარი. იგივე შემიძლია გითხრათ ირაკლი ოქრუაშვილის შემთხვევაშიც. იგი თავად გადაწყვეტს, გააკეთებს თუ არა კომენტარს ამ თემაზე,"_აღნიშნა ტლაშაძემ "ჯი-ეიჩ-ენთან" საუბრისას.
შეგახსენებთ, "კოკოითი ფანდარასტის" ყოფილმა ხელმძღვანელმა ვლადიმერ სანაკოევმა სკანდალური თვითაღიარებისას განაცხადა, რომ იგი რუსული "ეფ-ეს-ბეს" დავალებებს ასრულებდა.
ვლადიმერ სანაკოევმა, რომელიც 2004-2008 წლებში საქართველოს მთავრობასთან დაახლოებულ პირად ითვლებოდა, ირაკლი ოქრუაშვილიც მოიხსენია. მისი თქმით, რომ არა საკუთარი პერსონა, საქართველოს თავდაცვის ყოფილი მინისტრი_ ირაკლი ოქრუაშვილი ცხინვალში შეჭრას გეგმავდა, რის შემდეგაც მოვლენები რუსეთისთვის საზიანოდ განვითარდებოდა.
