საქართველოს პარლამენტის თავმჯდომარე დავით ბაქრაძე მსოფლიოს დემოკრატიულ პარტიათა კავშირის ახალგაზრდული ორგანიზაციის პრეზიდენტს დანიელ ვოლტერსა და ევროპის სახალხო პარტიის ახალგაზრდული ორგანიზაციის თავმჯდომარის მოადგილეს ტომას შნაიდერს შეხვდა.
როგორც "ჯი-ეიჩ-ენს" პარლამენტის პრესსამსახურიდან აცნობეს, შეხვედრაზე ბაქრაძემ სტუმრებს საქართველოში მიმდინარე დემოკრატიული, ეკონომიკური და კორუფციის წინააღმდეგ ბრძოლის კუთხით განხორციელებული რეფორმები გააცნო.
"საქართველო მყარად იკიდებს ფეხს ევროპის დიდ ოჯახსა და მსოფლიო დემოკრატიულ ქვეყნებს შორის. მუშაობა რომელიც საქართველოში წლების განმავლობაში მიმდინარეობს მხარდაჭერილია", - განუცხადა შეხვედრის დასრულების შემდეგ ჟურნალისტებს საფინანსო-საბიუჯეტო კომიტეტის თავმჯდომარემ, ზურაბ მელიქიშვილმა, რომელიც აღნიშნულ შეხვედრას თავადაც ესწრებოდა.