ლიტვაში ვიზიტით მყოფი საქართველოს ვიცე პრემიერ-მინისტრი გიორგი ბარამიძე რესპუბლიკის საგარეო საქმეთა მინისტრ აუდრონიუს აჟუბალის შეხვდა.
ვიცე პრემიერის აპარატის ინფორმაციით, შეხვედრაზე ბარამიძემ ყურადღება გაამახვილა ლიტვის, როგორც ეუთოს მოქმედი თავმჯდომარე ქვეყნის როლის გაძლიერებაზე, რუსეთ - საქართველოს კონფლიქტის მშვიდობიან დარეგულირების მნიშვნელობაზე და საერთაშორისო საზოგადოების მიერ საქართველოს ტერიტორიების ოკუპაციისა და ეთნიკური წმენდის აღიარების აუცილებლობაზე, რათა განისაზღვროს პრობლემის არსი და ერთობლივად მოიძებნოს მისი მოგვარების გზები.
აღსანიშნავია, რომ დღეიდან გიორგი ბარამიძე, ასევე, ორმხრივ შეხვედრებს გამართავს ლიტვის რესპუბლიკის პრემიერ-მინისტრთან, თავდაცვის მინისტრთან და პარლამენტის ვიცე- სპიკერთან და მონაწილეობას მიიღებს თავისუფლების დამცველთა დღის ოცი წლისთავის აღსანიშნავ ღონისძიებებში.
შეგახსენებთ, რომ ბარამიძე ლიტვაში ოფიციალური ვიზიტით იმყოფება.
