სომალის დედაქალაქ მოგადიშოში, სანაპიროზე მომხდარი აფეთქების შედეგად, სულ მცირე, 32 მშვიდობიანი მოქალაქე დაიღუპა, ხოლო 63 დაიჭრა.
პოლიციის სპიკერის, აბდიფატაჰ ადენის თქმით, ერთ-ერთმა თავდამსხმელმა თავი აიფეთქა, სამი უშიშროების ძალებმა მოკლეს, ერთი კი ცოცხალი დააკავეს.
ადენმა დაამატა, რომ მშვიდობიანი მოსახლეობის გარდა თავდასხმის დროს ერთი ჯარისკაციც დაიღუპა.
ადგილობრივი მედია წერს, რომ თავდასხმის უკან ისლამისტური დაჯგუფება ალ-შაბაბი დგას.
მიუხედავად იმისა, რომ დაჯგუფებას მომხდარზე პასუხისმგებლობა არ აუღია, მედია აღნიშნავს, რომ მათ წარსულში მსგავსი თავდასხმა განუხორციელებიათ, მათ შორის 2022 წელს, როდესაც დანაღმული მანქანა ააფეთქეს.
ალ-შაბაბი სომალიში დაფუძნებული ისლამური ფუნდამენტალისტური დაჯგუფებაა, რომელიც 2006 წლიდან სომალის მთავრობის წინააღმდეგ ომს აწარმოებს. მათი მიზანი ცენტრალური ხელისუფლების დამხობაა. 2010 წლებში მთავრობის მხრიდან გარკვეული წინსვლის მიუხედავად, ალ-შაბაბი სამხრეთ და ცენტრალურ სომალიში ტერიტორიებს აკონტროლებს და ტერაქტების მოწყობას განაგრძობს.
ალ-შაბაბს მსგავსი თავდასხმები წარსულშიც აქვს მოწყობილი, მათ შორის 2022 წელს მანქანებში ბომბების აფეთქება.
