სუს-ის მიერ ახალი გადატრიალების თუ შეთქმულების თეორიების ანონსი, სადაც, მათი თქმით, საქართველოს ის მოქალაქეები ფიგურირებენ, რომლებიც დღეს უკრაინის სახელმწიფო სახელმწიფო სამსახურში არიან, ნიშნავს იმას, რომ სუს-ი გადატრიალების მოწყობაში უკრაინის კვალს ხედავს, მაშინ როცა დასავლეთის ქვეყნებს აგრესორი რუსეთი ტერორისტულ სახელმწიფოდ ჰყავს გამოცხადებული, – ამის შესახებ ოპოზიციონერმა დეპუტატმა, თეონა აქუბარდიამ განაცხადა.

აქუბარდიას თქმით, 2014 წლიდან მოყოლებული, არაერთი „გადატრიალების“ საქმეზე გვახსოვს გამოძიების დაწყება და არცერთ მათგანზე გამოძიება არ დასრულებულა, 

მისივე თქმით, „ქართულ ოცნების“ პროპაგანდას ეს ყველაზე მეტად სჭირდება შიშის დანერგვის გზით ძალაუფლების შესანარჩუნებლად.

„მთელმა მსოფლიომ იხილა ორთვიანი მშვიდობიანი პროტესტი „რუსული კანონის“ წინააღმდეგ, ისევე როგორც დღეს მიმდინარეობს მშვიდობიანი მზადება არჩევნების გზით რუსეთის ინტერესების გატარებაში მყოფი მმართველი პარტიის შეცვლისა. საგულისხმოა „ოცნების“ პროპაგანდა „გლობალური ომის პარტიასთან“ დაკავშირებით, რითაც ისინი დასავლეთის მტრობაზე აკეთებენ მორიგ აქცენტს, მით უფრო, როცა პრემიერი დაჟინებით აგრძელებს პროპაგანდას ევროკომისრის მიერ მისი სიცოცხლისთვის საფრთხის შექმნის შესახებ, მიუხედავად სუს-ის უფროსის მიერ გაკეთებული განცხადებისა ამ საქმის უსაფუძვლობის შესახებ. წლების განმავლობაში პოლიტიკური ინტერესების მიზნით გადატრიალების სცენარი სუს-ის მიერ უცვლელია და ახლა „ოცნების“ პროპაგანდას ეს ყველაზე მეტად სჭირდება შიშის დანერგვის გზით ძალაუფლების შესანარჩუნებლად. ფაქტია: მშვიდობა მოაქვს ევროპულ ოჯახში გაერთიანებას, სადაც ომები არ არის, ხოლო ნგრევა და უბედურება – რუსეთს, რომელზეც აკეთებს ფსონს „ქართული ოცნება“, – პირველი არხის ცნობით, განაცხადა თეონა აქუბარდიამ.