12 იანვარს, 17.00 საათზე "ტფილისის ჰამქარი" "ზარია ვოსტოკას" შენობის გადასარჩენად აქციას გამართავს.
როგორც "ჯი-ეიჩ-ენთან" საუბრისას "ტფილისის ჰამქარის" ხელმძღვანელმა ალექსანდრე ელისაშვილმა განაცხადა, მათი მიზანია, ქალაქის ხელმძღვანელობამ შენობის ნგრევა შეაჩეროს და საქმეში კვალიფიციური ექსპერტები ჩართონ.
"პროექტი არცაა გამოქვეყნებული. ხოლო ის პროექტები, რომლებიც მერიის საიტზე დევს, ორია და უცნობია, რომლის განხორციელებას აპირებენ,"_განაცხადა ელისაშვილმა.
ექსპერტთა შეფასებით, შენობას მინიმალური რესტავრაცია სჭირდებოდა. სავარაუდო პროექტი კი სრულიად ცვლის შენობის სტრუქტურას და ნაგებობა პირვანდელ სახეს დაკარგავს. "ტფილისის ჰამქარის" განცხადებით, შენობას ხუროთმოძღვრული ღირებულების გარდა ისტორიული და ურბანული დატვირთვაც გააჩნია.
ცნობისთვის, სომეხი ხუროთმოძღვრის დავით ჩისლევის პროექტით 1930 წელს აშენებულ ნაგებობას, სადაც "ზარია ვოსტოკა" განთავსდა, ძეგლის სტატუსი 2006 წელს ჩამოერთვა.
შეგახსენებთ, რუსთაველის # 42-ში მდებარე "ზარია ვოსტოკას" შენობის ერთი მესამედი უკვე დანგრეულია. დემონტაჟი წინასწარი განხილვისა და ექსპერტების ჩართვის გარეშე დაიწყო.