ქართულ მხარეს უნგრეთის თავმჯდომარეობის პირობებში ევროკავშირთან ურთიერთობის გაუმჯობესების იმედი აქვს.
"2010 წელს ევროკავშირთან დაახლოების პროცესში საკმაოდ წარმატებული ნაბიჯები გადავდგით. იმედია ეს ტენდენცია შენარჩუნდება და გაუმჯობესდება კიდეც უნგრეთის თავმჯდომარეობის დროს", - განუცხადა კალანდაძემ "ჯი-ეიჩ-ენს" აღნიშნულ საკითხზე კომენტირებისას.
მისივე განმარტებით, აღნიშნულის თქმის საფუძველს ორი გარემოება აძლევს, მათ შორის ერთ-ერთი ისაა, რომ უნგრეთი საქართველოს ევროკავშირში გაწევრიანების აქტიური მხარდამჭერია.
"ერთს მხრივ უნგრეთი ჩვენი მოკავშირე სახელმწიფოა და ევროკავშირში საქართველოს გაწევრიანების აქტიური მხარდამჭერი, მეორეს მხრივ მას თავად აქვს განვლილი ორგანიზაციაში ინტეგრაციის გზაზე ძალიან ბევრი მტკივნეული ნაბიჯი, მათ შორის სწრაფი რეფორმები", - აღნიშნა კალანდაძემ.
შეგახსენებთ, რომ რამდენიმე დღის წინ უნგრეთმა ევროკავშირის თავმჯდომარეობა ოფიციალურად გადაიბარა.
შესაბამისი ცერემონიალი ბუდაპეშტიში გაიმართა. უნგრეთი ორგანიზაციას 6 თვის უხელმძღვანელებს. ქვეყანას კავშირის ხელმძღვანელობა როტაციის პრინციპით ბელგიისგან ერგო.
