ოფიციალურ თბილისს სომალელ მეკობრეებთან, როგორც ტერორისტებთან, მოლაპარაკებების სურვილი არ აქვს.
"ჩვენ მხოლოდ და მხოლოდ გემთმფლობელ კომპანიასთან გვაქვს კავშირი, რადგან არც სხვა შესაძლებობა გაგვაჩნია და არც სურვილი გვაქვს სახელმწიფო ტერორისტებთან მოლაპარაკებებში რაიმე ფორმით შევიდეს", - განაცხადა საქართველოს საგარეო საქმეთა მინისტრის მოადგილე ნინო კალანდაძემ დღეს გამართულ პრესკონფერენციაზე.
ამასთან, მისი განმარტებით, გემთმფლობელი კომპანიის მიერ მოწოდებული ბოლო ინფორმაციით, კომპანია მზად არის მეკობრეებს გარკვეული ოდენობის თანხა გადაუხადოს, თუმცა არა იმ რაოდენობის, რასაც სომალელები ითხოვენ.
"დამატებით ინფორმაციას მეკობრეებთან დაკავშირებით ამ ეტაპზე არ ვფლობთ", - განმარტა კალანდაძემ.
შეგახსენებთ, რომ სომალელმა მეკობრეებმა გემი, რომელზეც საქართველოს 15 მოქალაქე იმყოფება, 8 სექტემბერს, ადენის ყურეში დააკავეს.
სომალელი მეკობრეების ტყვეობაში მყოფი საქართველოს მოქალაქეები შველას ითხოვენ. მეკობრეებმა მათ უკვე 5 დღეა საჭმლისა და სასმელის მიწოდება შეუწყვიტეს.
