აჭარა ველო ტურიზმის განვითარებას იწყებს. აჭარის ტურიზმის დეპარტამენტის თავმჯდომარის თემურ დიასამიძის ინფორმაციით, "თამარის" (ეწ ბენზე) დასახლებიდან ბულვარის ბოლომდე საზოგადოებრივი ველო სისტემა მოეწყობა, სადაც ნებისმიერ მსურველს ველოსიპედით გასეირნება და მისი დაქირავება შეეძლება.
დიასამიძის ინფორმაციით, პროექტის ღირებულება დაახლოებით 200 ათას ევროს შეადგენს და მის ოპერირებას სავარაუდოდ ფრანგული კომპანია Intercycles-ს განახორციელებს, რომელსაც ამ მიმართულებით დიდი გამოცდილება აქვს. ბათუმის საზოგადოებრივი ველო სისტემის მოწყობით, თურქული, ესპანური, ჩეხური და დანიური კომპანიებიც არიან დაინტერესებულნი, თუმცა საბოლოოდ არჩევანი და კონკრეტულ კომპანიასთან კონტრაქტი გაფორმებული არ არის.
აჭარის ტურიზმის დეპარტამენტში ფიქრობენ, რომ პროექტი ჯანსაღი ცხოვრების წესის პოპულარიზაციას შეუწყობს ხელს, განტვირთავს მოძრაობას და ხელს შეუწყობს ეკოლოგიური მდგომარეობის გაუმჯობესებას.
ველო ტრასის მშენებლობა უკვე დაწყებულია და 2011 წლის ტურისტული სეზონიდან სრული დატვირთვით ამუშავდება კიდეც.
აჭარის ტურიზმის დეპარტამენტში აცხადებენ, რომ სისტემა პირველია საქართველოში და მთელს პოსტსაბჭოურ ქვეყნებში; ბათუმის ველო სისტემა იძლევა კარგ საშუალებას იაფად, უსაფრთხოდ გადაადგილებისა და ქალაქის დათვალიერების. აღნიშნული სისტემის დანერგვა გაამრავალფეროვნებს ტურისტულ პროდუქტს.
ამ დროისათვის ქუჩებზე ველოსიპედისტების განკუთვნილი ბილიკების დახაზვა მიმდინარეობს, პირველი ეტაპისათვის უკვე დაწყებულია ბილიკების დახაზვა სანაპირო ზოლის მიმდებარე ტერიტორიაზე, (სულ მახინჯაურიდან კვარიათამდე 30 კმ), მეორე ეტაპზე, დაიხაზება ძველ ბეთუმში და შემდეგ ქალაქის სხვა დანარჩენ ქუჩებში (40 კმ).
საზოგადოებრივი ველო სისტემა სამომავლოდ ქობულეთის ბოლომდეც დაგრძელდება.
ტრასას პირველი ეტაპისათვის 300-მდე თანამედროვე სტანდარტებით აღჭურვილი ველოსიპედი მოემსახურება და რაც მთავარია ანგარიშწორება ევროპული სტანდარტების სისტემებით განხორციელდება.
ველო სისტემებით სარგებლობა შესაძლებელი იქნება 24 საათის განმავლობაში, მომხმარებელს შეუძლია იქირაოს ველოსიპედი 24 საათის განმავლობაში, ასეთი ტერმინალები ქალაქში იქნება რამდენიმე, გადახდა იწარმოებს სპეციალური ბარათების საშუალებით.