"სააკაშვილი და მისი რეჟიმის თავკაცები, რომლებიც ჩვენი ხალხისათვის დიდი ხანია ხაზინის ქურდობის და კორუფციის სიმბოლოებად გადაიქცნენ, არაფრად აგდებენ ხალხის გაჭირვებას, არავის და არაფერს უწევენ ანგარიშს თავისი ახირებული სურვილების აღსრულებისას. თვითმხილველთა მოწმობით, დარბევამდე ცოტა ხნით ადრე, გმირთა მოედანზე სააკაშვილის კორტეჟს ჩაუვლია. ბევრს მიაჩნია, რომ ამის შემდეგ თვითონ სააკაშვილმა გასცა აქციის დარბევის უკანონო ბრძანება. ვაფრთხილებთ ყველას, ვისაც უხდება სააკაშვილისა და მისი რეჟიმის უკანონო ბრძანებების აღსრულება, რომ ახლოვდება ის დრო, როდესაც კანონის სრული სიმკაცრით დაისჯებიან ყველა უკანონო ქმედების შემსრულებლებიც და დამკვეთებიც", - ნათქვამია ექს-პრემიერის ზურაბ ნოღაიდელის პარტიის მიერ გავრცელებულ განცხადებაში.
მათივე თქმით, დამოუკიდებელი იურისტებისა და სახალხო დამცველის აზრით აქციის მონაწილეებს არ დაურღვევიათ საქართველოს კანონმდებლობა, სამართალდამცველთა მოქმედება კი სრულიად უკანონო იყო; ასევე სრულიად უსამართლო და უკანონო იყო სასამართლოს მოქმედება და გადაწყვეტილება აქციის უკანონოდ დაკავებულ მონაწილეთა მიმართ.
"მიგვაჩნია, რომ სამართალდამცველთა და სასამართლოს ასეთი თავგასულობა, ყბადაღებული უსამართლო მოქმედება, ასაბუთებს იმას, რომ ისინი სააკაშვილის პირად ბრძანებას ასრულებდნენ და დაუსჯელობის სრული გარანტია აქვთ მიღებული. ჩვენ მოვითხოვთ სამართლიანობის აღდგენას და აქციის უკანონო დარბევის მონაწილეთა დასჯას", - ნათქვამია განცხადებაში.
შეგახსენეთ, რომ 3 იანვარს გმირთა მოედანზე ვეტერანების შიმშილობის აქცია პოლიციამ ძალის გამოყენებით დაშალა და წინააღმდეგობის გაწევის გამო 7 ადამიანი დააკავა, რომელთაც სასამართლომ 400-400 ლარიანი ჯარიმა დაკისრა.
აღსანიშნავია, რომ 4 იანვარს პოლიციამ ვეტერანების მხარდამჭერებს გმირთა მოედანზე აქციის ჩატარების უფლება არ მისცა.