ჩემთვისაც გაუგებარია, რატომ არ აწერს ხელს პრეზიდენტი. განსაკუთრებით მაშინ, როცა მას საჯაროდ უკვე დაფიქსირებული აქვს სწორი პოზიცია, რომ აუცილებლად უნდა ჩამოერთვას საქართველოს მოქალაქეობა რუს ჯაშუშ ოთარ ფარცხალაძეს, – ამის შესახებ პარტია „ნაციონალური მოძრაობის“ წევრმა, თინა ბოკუჩავამ განაცხადა.
„არ მესმის, რატომ ხდება ამის გაურკვეველი ვადით და თუნდაც რამდენიმე საათით გაწელვა. იმედი მაქვს, დროულად მოხდება გადაწყვეტილების მიღება. ხაზგასასმელია, რომ იუსტიციის სამინისტრომ მოქალაქეობის შეწყვეტის შესახებ გადაწყვეტილება პრეზიდენტს ხელმოსაწერად მხოლოდ და მხოლოდ მას შემდეგ გაუგზავნა, რაც ოთარ ფარცხალაძეს, რუს ჯაშუშს მიეცა საშუალება, მთელი მისი ქონება, იქნებოდა ეს ეკლესია, რომელმაც გარკვეული გაკვირვება გამოიწვია საზოგადიებაში, თუ მრავალი კომერციული ფართი თბილისის ცენტრში, თავის შვილს გადასცა. შესაბამისად, უკვე სანქციებს ეფექტურად აარიდა თავი ივანიშვილის სახელმწიფო უწყებების გამოყენებით. სანქციების მთელი არსი სწორედ ის არის, რომ მას მანევრირების საშუალება შეეზღუდოს“, – განაცხადა თინა ბოკუჩავამ.
