აფხაზეთის მთავრობის თავმჯდომარე გიორგი ბარამაია გამოეხმაურა "როიტერის" მიერ გავრცელებულ კადრებს, ფიჩორში რუსული სამხედრო ბაზის გახსნასთან დაკავშირებით და განაცხადა, რომ გალის რაიონში, ადმინისტრაციულ საზღვართან ახლოს, რუსეთის უშიშროების სამსახურის სასაზღვრო ძალების სამხედრო ქალაქის გახსნით, კრემლი ცდილობს დაადასტუროს, რომ აფხაზეთის ტერიტორია რუსეთს ეკუთვნის და არა საქართველოს.
"გალის რაიონში მდებარე 6 რუსული სამხედრო ბაზიდან ფიჩორს განსაკუთრებული დანიშნულება აქვს, რადგან სწორედ აქედან ხდება რეგიონში განთავსებული სხვა ბაზების კოორდინაცია, ამ პუნქტიდან იმართება ის დესტრუქციული, ანტისახელმწიფოებრივი ქმედებები, რომელსაც რუსეთი საქართველოს წინააღმდეგ მიმართავს", - განაცხადა ბარამაიამ.
აფხაზეთის მთავრობის თავმჯდომარემ ხაზი გაუსვა, რომ ოკუპანტების ჩანაფიქრით, ფიჩორის სამხედრო ბაზამ უნდა გააკონტროლოს საზღვაო აკვატორია. სახმელეთო საზღვრის მთელი პერიმეტრი ენგურზე და ყველა გადასასვლელი.
"ფაქტობრივად, კრემლის მომდევნო ნაბიჯი რუსეთ-საქართველოს საზღვრის ფსოუდან ენგურზე გადმოტანა იქნება, რაც კიდევ უფრო გაართულებს ადმინისტარციულ საზღვარზე გალის რაიონის მოსახლეობის გადაადგილებას", - აღნიშნა ბარამიამ ჟურნალისტებთან შეხვედრისას.
"ბოლო ხანებში ინტენსიურად მიმდინარეობს რეგიონის მილიტარიზაცია, რუსეთის მიზანია გალის სამხედრო ქალაქად გადაქცევა. დაგეგმილია რუსი ოფიცრების ოჯახების ჩამოსახლება, რაც იმის თქმის საფუძველს გვაძლევს, რომ მოკლე ხანებში რუსეთმა შეიძლება განცხადებაც კი გააკეთოს გალის რაიონის საზღვარზე სავიზო რეჟიმის შემოღების შესახებ", - განაცხადა აფხაზეთის მთავრობის თავმჯდომარემ.
