"ქრისტიან-დემოკრატები" საქართველოს მთავრობას პარლამენტის უპატივცემულობაში ადანაშაულებენ. აღნიშნული განცხადება დღევანდელ ბიუროს სხდომაზე "ქრისტიან-დემოკრატების" ლიდერმა გიორგი თარგამაძემ გააკეთა.
"რამდენიმე თვის წინ პარლამენტმა მიიღო დადგენილება, რომ გენმოდიფიცირებული პროდუქციის მარკირების წესის შესახებ მთავრობას კანონპროექტი უნდა შემოეტანა, თუმცა ამ დრომდე არ შემოსულა. მოვითხოვთ მთავრობამ შეასრულოს პარლამენტის დადგენილება, პატივის სცეს მას და წლის ბოლომდე აღნიშნული კანონპროექტი შემოიტანოს", - აღნიშნა თარგამაძემ.
მისივე თქმით, საქართველოს მოსახლეობას უნდა ჰქონდეს შესაძლებლობა, რომ გაარჩიოს ბიოლოგიურად სუფთა პროდუქტი გენმოდიფიცირებულისგან, რომელიც ადამიანის ჯანმრთელობისთვის საზიანოა.
"მოვითხოვთ, რომ მთავრობამ 2011 წლის 1-ელ იანვრამდე მოახდინოს პარლამენტში კანონპროექტის შემოტანა, რომ მისი მიღება წლის პირველ ნახევრამდე მაინც შევძლოთ", - აღნიშნა საპარლამენტო უმცირესობის ლიდერმა.
