პრეზიდენტის პრესსპიკერ მანანა მანჯგალაძის თქმით, სამიტზე მსოფლიოს ლიდერებმა კიდევ ერთხელ გამოხატეს მხარდაჭერა საქართველოს ტერიტორიული მთლიანობისა და სუვერენიტეტის შესახებ.
"ნიშანდობლივი იყო ის განცხადებები, რომელიც ასტანაში გაკეთდა. ყაზახეთში, პრაქტიკულად ყველა სახელმწიფო ლიდერის მიერ კიდევ ერთხელ დადასტურდა საქართველოს ტერიტორიული მთლიანობა და სუვერენიტეტი. გაკეთდა პირდაპირი მოთხოვნები რუსეთის ფედერაციის სამხედრო შეიარაღების საქართველოდან გაყვანის შესახებ. სამწუხაროდ, კიდევ ერთხელ გახდა ცხადი რუსეთის არაკონსტრუქციული პოზიციის შესახებ. მიუხედავად ამისა ასტანის დეკლარაციამ შეძლო დაფიქსირება ეუთოს ურყევი პოზიციისა საქართველოს ტერიტორიული მთლიანობის დაცვისა და საზღვრების ურღვევობის თაობაზე", - განაცხადა მანანა მანჯგალაძემ პრეზიდენტის სასახლეში გამართულ ყოველკვირეულ ბრიფინგზე.
შეგახსენებთ, რომ ეუთოს სამიტი ყაზახეთის დედაქალაქ ასტანაში 1-2 დეკემბერს გაიმართა.
